VOV4.Jarai - Amăng hơdôm hrơi giăm anai ƀơi tơring čar Kon Tum ƀuh lu anom bơwih ƀong sĭ mơdrô hăng sang anŏ bơwih ƀong sĭ mơdrô tuh pơ alin dưm kân điện tử kiăng blơi pơhrui gơnam đang hmua. Sit biă ñu brơi ƀuh hrŏm hăng hơdôm anŏ gal djru brơi mơnuih ƀon sang, biă mă ñu lĕ ƀơi kual ataih, asuek, kual mơnuih djuai ania ƀiă sĭ mơdrô gơnam đang hmua amuñ samơ̆ hơdôm anih kân điện tử anai glăk ƀuh lu anŏ soh bơbeč nao bruă sĭ mơdrô hăng ngă lu mơnuih bơngŏt.

Jơlan mrô 678 găn nao 4 boh să: Đăk Tờ Kan, Đăk Rơ Ông, Đăk Sao hăng Đăk Na, tơring glông Tu Mơ Rông, tơring čar Kon Tum glông 27 km samơ̆ ră anai hơmâo truh pơ 10 anih dưm kân điện tử pioh blơi pơhrui gơnam đang hmua. Amăng anun, kơnong ƀơi să Đăk Rơ Ông hơmâo lu hloh hăng 5 anih dưm kân điện tử. Ơi Ngụy Đình Phúc, Khua grup wai lăng sĭ mơdrô mrô 2, anom bruă wai lăng sĭ mơdrô tơring čar Kon Tum brơi thâo, mơng pel ĕp sit nik brơi ƀuh hơmâo Anih dưm kân điện tử blơi pơhrui gơnam đang hmua lêng kơ ƀuh anŏ soh:

“Blung hlâo lĕ hơdôm anih dưm kân điện tử ƀing gơñu yua kân ƀu hơmâo tem pơkra pơjing hăng anih wai lăng djơ̆ hăng tơlơi pơkă. Ƀơi hơdôm anih blơi gơnam đang hmua ƀu čih tong ten nua blơi gơnam djơ̆ hăng tơlơi pơkă yua anun lĕ nua sĭ mơdrô mơng hơdôm anih dưm kân điện tử phara yua anun mơnuih ƀon sang sĭ plum pơhrui glăi ƀu bơkơnar. Ƀing gơmơi him lăng hơdôm kân anai ƀu pơhlôm djơ̆ ôh.

Pel ĕp ƀuh lu anŏ saoh ƀơi hơdôm anih dưm kân điện tử

Hrŏm hăng hơdôm anŏ soh amăng bruă sĭ mơdrô, anun lĕ: ƀu hơmâo hră pơ-ar brơi pok anom bơwih ƀong sĭ mơdrô; kân ƀu hơmâo tem; kơƀah hăng ƀu hơmâo hră pơ-ar pơsit brơi hơdôm anih dưm kân điện tử, blơi pơhrui gơnam ƀu djơ̆ anih pơkă, ƀu lăi pơthâo tong ten nua blơi gơnam tam… 10 anih dưm kân điện tử blơi pơhrui gơnam đang hmua kơtuai tui jơlan mrô 678 găn nao 4 boh să amăng tơring glông Tu Mơ Rông dŏ ƀuh lu anŏ soh anun lĕ: pok jơlan mut nao rai hăng jơlan prong ča čot, klơi mă lŏn dua bơnah jơlan dưm kân điện tử, man pơdong sua mă jơlan mơnuih rok nao rai. Ơi Nguyễn Thái Hoàng Anh, mơnuih apăn bruă gah pel ĕp, gơnong bruă wai lăng jơlan glông tơring čar Kon Tum brơi thâo:

“Bruă blung a lĕ pok jơlan ča čot mut nao rai hăng jơlan prong mơ̆ ƀu hơmâo tơlơi tŭ ư mơng hơdôm anom bruă bơdjơ̆ nao. Bruă anai amra pơsua, ngă bơrơjah kơ bruă mă yua jơlan glông ƀơi anai mơ̆ hơdôm anih dưm kân anai pok mă jơlan mut nao rai. Hrŏm hăng bruă anai ăt kiăng lăi nao rơđah dong kơ bruă ngă brơi hră pơ-ar pok anom bơwih ƀong sĭ mơdrô ƀu lăp djơ̆. Biă mă ñu lĕ hlâo kơ hơmâo hră pơ-ar čih anăn bơwih ƀong sĭ mơdrô, ƀing gơñu kiăng kơ hơmâo hră pơ-ar pok jơlan mut nao rai, bơ ƀơi anai ngă phara yua anun ră anai ƀuh lu anŏ ngă soh”.

Kân điện tử ƀơi plơi Mô Bành, să Đăk Rơ Ông dưm soh pơgăn jơlan arăng rơbat nao rai

Tui jŭ yap mơng anom bruă bơdjơ̆ nao tơring glông Tu Mơ Rông brơi ƀuh, amăng tơring glông ră anai hơmâo 15 anih dưm kân điện tử pioh blơi pơhrui gơnam đang hmua hăng lu hloh lĕ blơi pơhrui plum mơng mơnuih ƀon sang. Hrŏm hăng anŏ gal lĕ djru brơi mơnuih ƀon sang, biă mă ñu lĕ ƀơi kual ataih, asuek, kual mơnuih djuai ania ƀiă amuñ ba sĭ mơdrô plum samơ̆ hơdôm anih dưm kân anai ăt dŏ lu anŏ soh bơbeč nao hơdôm bruă sĭ mơdrô hăng ngă bơngŏt amăng mơnuih ƀon sang. Sit biă ñu ƀuh leč ƀlor; pơhrŏ trun kĭ lăi yua lu asuk ruk ngă rơngiă lu kĭ; ƀing blơi gơnam ƀu tong ten kiăng kơ blơi nua ƀiă đôč ( amăng sang măi blơi mơng 2.300 truh pơ 2.400 prăk/kĭ ƀudah đa hrŏ trun ƀiă dong)… Ƀơi anăp kơ bruă hơdôm anih dưm kân điện tử blơi pơhrui gơnam amăng ƀon lan hơmâo lu anŏ soh, bơbeč nao bruă sĭ mơdrô hăng pơhlôm hơđong amăng plơi pla, ơi Phạm Xuân Quang, kơ-iăng khua Jơnum min mơnuih ƀon sang tơring glông Tu Mơ Rông brơi thâo, gong gai tơring glông hơmâo git gai pel ĕp kơ bruă anai:

“Tơring glông hơmâo kơtưn amăng bruă git gai hơdôm să wai lăng kjăp ƀu brơi pok hơdôm anih dưm kân điện tử dong tah. Hăng hơdôm anih dưm kân amăng tơring glông hơmâo tơlơi črâo ba, rơkâo hơdôm anih dưm kân anai tañ ngă hră pơ-ar djơ̆ hăng tơlơi pơkă hăng ngă tui djơ̆ tơlơi phiăn. Bơ hơdôm anih dưm kân ƀing gơmơi amra rơkâo anom bruă pel ĕp jơlan glông nao pok brơi jơlan mut nao rai. Laih dong bruă kân blơi pơhrui nua pơhlôm hơđong, ƀing gơmơi hơmâo mă bruă hăng anom wai lăng sĭ mơdrô hrŏm hăng anom bruă pel ĕp ngă klă mơng gơnong bruă boh thâo kiăng kơ wai lăng, pel ĕp”.

Amăng 10 boh tơring glông, plơi prong măng tơring čar Kon Tum, jŭ yap kơnong amăng 2 boh tơring glông Tu Mơ Rông hăng Đăk Tô ră anai hơmâo 32 anih dưm kân điện tử blơi pơhrui gơnam đang hmua. Mơng pel ĕp jang jai mơng grup wai lăng sĭ mơdrô mrô 2, Anom bruă wai lăng sĭ mơdrô amăng tơring čar Kon Tum, gơnong bruă boh thâ măi mok hrŏm hăng gơnong bruă bơdjơ̆ nao 2 boh tơring glông anai brơi ƀuh, abih bang anih dưm kân điện tử ƀơi anom bơwih ƀong sĭ mơdrô hăng sang anŏ blơi pơhrui gơnam lêng ƀu pơhlôm djơ̆ hăng tơlơi pơkă. Hăng ăt yua ƀu ngă tui djơ̆ hơdôm hơdră wai lăng mơng blung mơtăm ba truh kơ bruă hơdôm kân điện tử blơi pơhrui gơnam đang hmua ba glăi anŏ sat lơ̆m kân blơi pơhrui gơnam hăng ngă bơngŏt amăng mơnuih mơnam yua anun kiăng pơsir hĭ mơtăm.

Siu Đoan: Pơblang