Kiăng pơhlôm hlâo apui ƀong glai, djop sang bruă, pô wai lăng glai rưng hrŏm hăng tơhan djop sang bruă prăp lui gơnam yua mă bruă, rơdêh đĭ hyu mă bruă krăo lăng hrơi hăng mlam. Ƀơi tơring glông Đak Tô, Đak Hà, Sa Thầy, Kon Braih, Ngok Hôi, Đak Glei, anih mơ̆ tơring čar Kon Tum pơtong sit, lu đang glai klô hăng glai kyâo pla hŭi biă mă apui ƀong, anun djop anom bruă, pô đang glai laih anun gong gai kơnuk kơna djop kual plơi pla ƀơi Kon Tum akŏ pơjing khul grup pơpha hyu ĕp lăng dŏ gak wai, mă bruă pơgăn jơlan mut tơbiă nao amăng glai klô; ĕp lăng kual giăm hmua đang mơnuih ƀôn sang, brơi kơđiăng amăng bruă čuh, tô̆ apui hŭi apui jă ƀong rok hyu.

Laih dơ̆ng, ling tơhan, kông an laih anun tơhan wai lăng glai gum hrŏm prăp lui lu hơdră, brơi khul ling tơhan, gơnam yua, rơdêh đĭ prăp lui mă bruă hơprah apui tơdah hơmâo tơlơi truh apui ƀong glai.