VOV4.Jarai - Tơlơi pơhing mơng Jơnum min mơnuih ƀon sang tơring glông Kon Plong, tơring čar Kon Tum brơi ƀuh, mah aka ƀu hơmâo tơlơi răm rai, rơngiă hơget ôh, samơ̆ hơdôm tal lŏn pơpư̆ amăng hrơi blan rơgao ngă mơnuih ƀon sang bral, bơngơ̆t biă. Hrŏm hăng tơlơi rơkâo đĭ khua mua, ƀing kơhnâo thâo laih tơhnal ñu, gong gai tơring glông ăt prăp lui hơdră pơgang, krăp lăng lu hloh, pơtô pơblang mơnuih ƀon sang kiăng tañ hmư̆ hing, mơng anun thâo pơgang glăi bruă lŏn pơpư̆.

Bơdjơ̆ nao bruă lŏn pơpư̆ čư̆ mơgơi ngă tơtar lŏn ƀơi tơring glông Kon Plong, phrâo anai Jơnum min mơnuih ƀon sang tơring čar Kon Tum kiăng Kông ti pơčruh ngăn apui lơtrik Vĩnh Sơn - Sông Hinh hăng Kông ti pơčruh ngăn apui lơtrik Đăk Đrinh lăng glăi rơnuk rơnua ƀơi anih gơñu wai lăng; prăp lui mơnuih mă bruă, rơdêh, gơnam yua pơsir tañ lơ̆m hơmâo tơlơi truh, pơhlôm djru ba tañ mơng mông phrâo ƀuh mơtăm, biă ñu tơlơi truh ngă hŭi rơhyưt ƀơi dơnao ia.

Siu H’Mai: Pơblang