Rơwang bruă bơnư̆ pơgang ia ling dăo, lŏn tơhroh ƀơi hơdôm bôh plơi neh wa djuai ania ƀiă rôk tui ia krông Đăk Bla ƀơi plơi prong Kon Tum hmâo abih bang ataih rơbêh kơ 4,4km. Rơwang bruă pơkra mơ̆ng blan 9 thun hlâo hăng pơkă hlâo blan 9 thun anai giong, samơ̆ truh ră anai kơnong kơ giong mă 18% kơčăo bruă. Abih bang mrô prăk yua kơ ring bruă rơbêh kơ 200 klai prăk, samơ̆ truh ră anai mrô bruă mơ̆ng rơwang bruă phrâo hmâo mă rơbêh kơ 60 klai prăk.

Anai lĕ rơwang bruă phun mơ̆ng tơring čar, anun thun 2023 hmâo pơpha djop prăk ngăn drăp dêh čar; tơdơi kơ anun dưi pơhrư̆i hrơi man pơkra hăng pơsir prăk truh lơ 31/12/2024. Samơ̆ rơwang bruă anai tơnap biă mơ̆ng dưi pơdŏng giong tui hrơi pơkă yua kơ lu tơlơi gun gah anih anom pơkra ring bruă. Hrŏm hăng Rơwang bruă bơnư̆ pơgăn ia ling dăo, lŏn tơhroh ƀơi hơdôm bôh plơi neh wa djuai ania ƀiă rôk tui ia krông Đăk Bla, hơdôm ring bruă phun ƀơi tơring čar Kon Tum ăt amra kaih giong mơn, ƀu dưi pơsir prăk mă yua pơkra ring bruă djơ̆ tui kơčăo bruă./.