Tui anun, anom bruă hơmâo man pơkra glăi pơbung klŭp hăng ngŏ hăng ƀơi tơkai bơnư̆, glông năng ai 60m. Prăk pioh ming pơkra bơnư̆ ia krông anai giăm 1 klai prăk. Ring bruă pơkra bơnư̆ pơgăn lŏn tơhlŏm ƀơi hang ia krông Pô Kô hơmâo pơkra sui mơ̆ng anai 14 thun laih, glông giăm 2km, prăk tuh pơ alin rơbêh kơ 93 klai prăk, prăk kơnuk kơna ta brơi trun. Kơnong bruă pơkra bơnư̆ gah Ngŏ hơmâo anih răm, him lăng amra rơngiă 37 klai 700 klăk prăk.

Thun 2013, khŏm pơdơi pơkra hăng nua prăk blơi gơnam man pơkra dưm truă hơmâo ngă rơbêh kơ 25 klai prăk. Truh thun 2019, ring bruă mơ̆ng hơmâo Jơnum min mơnuih ƀôn sang tơring čar Kon Tum brơi 12 klai prăk pioh tuh pơ alin pơkra hơdôm ring bruă dŏ glăi. Rơnuč thun 2021, ring bruă hơmâo man pơkra dưm truă giong laih, samơ̆ truh ră anai aka ƀu pơsit ôh anom bruă wai lăng đah mơ̆ng jao glăi, ba mă yua lĕ hơmâo tơlơi răm rai laih yua hơjan kơthel ngă, anun jing anom bruă man pơkra khŏm pơkra glăi dong.