VOV4.Jarai-Tơring čar Kon Tum ră anai hơmâo rơbêh 6.200 čô mơnuih ƀu klă drơi jăn hăng hơmâo lu amăng mrô mơnuih rơwen rơwo ƀu klă drơi jăn ƀu tơphă ôh amăng tơlơi hơdip mơda anun ƀu kơdŭn amăng tơlơi hơdip tơnap tap gleh glăr gơñu, hrưn đĭ ngă pô git gai mă tơlơi hơdip mơda bruă mă.

Amai Nguyễn Thị Kim Trúc, 49 thun brơi thâo, 23 thun hlâo adih dua ƀĕ tơkai ƀu thâo tơpư̆ hlư̆ ôh, ñu rai mơ̆ng plơi pla phun Bình Định, nao pơ Kon Tum hơduah ĕp ƀong huă akŏ pơdong tơlơi hơdip mơda. Găn rơgao lu bruă mă, mơ̆ng bruă hrăk hơñôl jal, hrăk ao pơđao arăng apah….kiăng ĕp ƀong rơgao hrơi, laih  anun pơkôm prăk kăk hơmâo hmăi pok sang sĭ mơdrô anet. Ƀu kơnong hrưn đĭ găn rơgao tơlơi tơnap tap lông lăng đôč ôh, ñu dưi ngă pô git gai mă tơlơi hơdip, bruă mă pô, amai Nguyễn Thị Kim Trúc dŏ jing sa čô mơnuih thâo pơpŭ hơdor tơngia kơ amĭ pô ba ama pô ƀă pơ sang anŏ ƀun rin hlăk gơñu dŏ hơdip mơda laih anun sa čô adơi đah rơkơi ñu ăt hơmâo tơlơi ruă mơ̆n dŏ pơ plơi pla adih.

Amai Nguyễn Thị Kim Trúc hăng sang  sĭ mơdrô mơ̆ng ñu pô

 Ƀu kơnong dơ̆ anun ôh, ñu djru ba 2 čô mơnuih mă bruă apah hơmâo bruă mă hrŏm hăng ñu. Lăi nao kơ bruă mă hăng tơlơi hơdip mơda ñu, amai Trúc lăi:

“Drơi jăn kâo pô khom hơdip hiam klă, ta pô ta pơmin mă, khom thâo dŏ dong ƀong huă rơ-un rơnang, hơmâo pran jua hiam. Sĭ mơdrô ăt khom tơpă pioh kơ mơnuih ƀôn sang ieo gah djru ba ta, rai blơi gơnam ta. Tơdah ra hơdip ƀu hiam klă tơpă hnong, hơdip ƀrưh hmiah sĭ mơdrô ăt ƀu gêh găl ôh, arăng ƀu pap ôh kơ ta. Pran jua hiam yơh phun. Rơwen  rơwo ƀu klă drơi jăn samơ̆ khom hơmâo pran jua hiam klă”.

Pap drap hrŏm tơlơi hơdip pô sang, tuai juăt blơi gơnam mut mă mă gơnam kiăng blơi laih anun brơi prăk tơl tơngan pô sang. Yă Nguyễn Thị Lan, dŏ pơ sang Grup 3, phường Duy Tân, sa čô mơnuih juăt blơi na nao gơnam ñu hăng pơdah rai tơlơi djru ba khăp pap kơ pô sang sĭ mơdrô, ñu lăi:

“A, amai Trúc anun hă. Sĭ mơdrô rơhmač tač, hur har mơak. Lăi tơpă sĭ mơdrô rơgêh hloh kơ arăng anun yơh amai Trúc hơmâo lu tuai nao blơi. Amai Trúc triăng biă mă gir run mă bruă. Sit mơ̆n ƀu tơphă ôh drơi jăn ƀu klă samơ̆ triăng mă bruă, dŏ dong ƀong huă rơgoh hơdjă anun djop mơnuih khăp pơpŭ, yua anun mơ̆n ñu hơmâo lu tuai nao blơi gơnam”.

Rĭm čô mơnuih hơmâo tơlơi hơdip mơda phara soh, rĭm mơnuih hơmâo amăng drơi jăn anŏ kơƀah  dŏ ƀu klă, phara mơ̆n samơ̆ hơmâo lu amăng mrô 6.200 čô mơnuih ƀu klă drơi jăn ƀơi tơring čar Kon Tum hơmâo sang anŏ pơdŏ rơkơi bơnai. Sa tơlơi ƀuh hrŏm lơ̆m pơhiăp hăng ƀing gơñu, anun lĕ tơlơi pơmin hrưn đĭ kơtang biă mă, pran jua mơak soh laih anun đăo kjăp kơ drơi jăn bruă mă mơ̆ng pô. Amai Phạm Thị Hồng Hương, 53 thun, dŏ pơ plơi Thôn 6, să Đoàn Kết, plơi prong Kon Tum ăt mơnuih ƀu klă drơi jăn mơ̆n, dơ̆ng mơ̆ng anet, ră anai ñu hơmâo tơčô baih, tơčô ană đah rơkơi hăng đah kơmơi samơ̆ ăt hur har mă bruă:

“Abih bang bruă mă pran jua kâo dưi ngă lĕ kâo gir ngă yơh. Mơguah lĕ kơhul điơ̆, tơñă asơi ñar ba sĭ mơdrô pơ anăp sang hră. Glăi lĕ yuă rơ̆k čem rơmô, čem un bui. Sit hơmâo wăn ƀiă nao pơkra gai tơnih hăng grup gir mă bruă pô. Tlam glăi pơ sang tơčoh sum ao tơ̆i arăng. Ƀuh rơđah mă bruă hơmâo prăk lĕ gir rin yơh ĕp prăk kơ ană tơčô, rơkơi sang ră anai ăt ruă nuă mơ̆n. Tơlơi čang rơmang mơ̆ng kâo lĕ hơdôm ƀing ƀu klă drơi jăn gir run hơdip hok mơak, khăp kơ tơlơi hơdip anăm anit ta pô ôh. Ta khom đăo kjăp pran jua mă bruă hơgĕt lĕ khom ngă kah hăng arăng mơ̆n amăng mơnuih mơnam plơi pla”.

Amai Phạm Thị Hồng Hương hăng sa amăng lu bruă mă rĭm hrơi ñu juăt ngă

Phrâo anai, Khul pơgang tơlơi dưi čơđai muai hăng Djru ba mơnuih ƀu klă drơi jăn tơring čar Kon Tum pơphun jơnum bơni kơ mơnuih ƀu klă drơi jăn ba gru hlâo. Yă Nguyễn Thị Ánh, Khua Khul brơi thâo:

“Jơnum tal anai ƀing gơmơi hơmâo 100 čô mơnuih pơ ala ƀing ƀu klă drơi jăn ƀơi djop tơring glông, plơi prong nao jơnum hrŏm. Hơdôm mơnuih ba gru hlâo pơ anai lĕ hơmâo Khul djru ba, đơ đa aka ƀu hơmâo djru ba ôh samơ̆ ăt jing sa bruă mă yôm mơ̆n ƀuh lu mơnuih gir run hrưn đĭ amăng tơlơi hơdip mơda, pơklaih mơ̆ng tơlơi ƀun rin, ngă pơdrong kơ sang anŏ laih anun mut hrom amăng djru kơ lu mơnuih ƀu klă drơi jăn pơkŏn dơ̆ng ƀun hloh kiăng hrưn đĭ.

Rĭm wơ̆t jơnum tui anun hơmâo tơlơi bang hyu prong. Ƀing dưi nao jơnum anai, glăi pơ plơi pla pơdah rai ba gru hlâo amăng bruă mă hiam pioh djru kơ lu mơnuih hơmâo bruă mă yôm djru nao rai tơdruă mơnuih jum dar pioh kơ arăng ƀuh gir run hrom hrưn đĭ amăng tơlơi hơdip mơda”.

Dơ̆ng mơ̆ng akŏ thun truh ră anai, kơnong Khul wai pơgang tơlơi dưi čơđai muai hăng Pơgang ba mơnuih ƀu klă drơi jăn tơring čar hơmâo djru 4 boh sang pơdong brơi phrâo, rơnoh prăk abih tih 125 klăk; djru 10 drơi ană rơmô rông tuh ană kơ sang anŏ mơnuih ƀu klă drơi jăn tơnap tap hăng hlăk prăp lui jao 200 boh rơdêh tung glung hăng tơngan pioh brơi kơ mơnuih ƀu klă drơi jăn.

Khoa Điềm pô čih-Nay Jek: Pơblang