VOV4.Jarai - Ƀơi tơring čar Kon Tum amăng hơdôm hrơi rơgao, ƀing phrâo ƀă kman covid-19 jai lu, yap truh lơ 23/2, mrô mơnuih F0 mơng tơring čar mơng hrơi hơmâo klin rơgao 6.000 čô laih. Hlâo kơ anun 2 hrơi, lơ 21 hăng 22/2, anom bruă ia jrao tơring čar Kon Tum čih pioh đơđam tơring čar hơmâo thim 344 čô mơnuih F0. Tơlơi bơngơ̆t lĕ mrô mơnuih phrâo ƀă klin amăng tơring čar ƀuh lu ƀơi kual ataih yaih, hăng kual mơnuih ƀon sang djuai ƀiă.

Khua mua tơring čar Kon Tum pel ĕp bruă pơgang klin Covid-19 ƀơi să Đăk Môn, tơring glông Đăk Glei.

Kiăng pơđĭ tui bruă pơgang klin, Anom bruă git gai pơgang klin Covid-19 tơring čar Kon Tum kiăng mơnuih ƀon sang hơđong pran jua, anăm bral đơi ôh, samơ̆ ƀu dưi pơ-ai lơi, khŏm răng kơđiăng mơn; ngă hrŏm hăng hơdôm anom apăn bruă, gong gai pơgang klin Covid-19; ngă tui tơlơi pơtrun 5K + Vaccine amăng bruă pơgang klin Covid-19 tui tơlơi pơtô ba mơng Ding jum ia jrao, biă ñu lĕ gôm ƀô̆ lơ̆m tơbiă mơng sang laih anun tlâ̆o vaccine pơgang Covid-19.

Siu H’Mai: Pơblang