VOV4.Jarai - Tơlơi lăi pơthâo mơng Anom bruă wai lăng glai tơring čar Kon Tum mơguah lơ 9/9 brơi thâo, Anom bruă wai lăng glai tơring glông Sa Thầy hơmâo ngă kơđi bruă mă kyâo ča čot ƀơi tơring glông. Tơdơi kơ hơmâo Tơlơi pơsit tơgŭ kơđi tơlơi soh prong “ngă soh bruă koh drôm, pơgang glai hăng mă kyâo sĭ mơdrô”, Anom bruă wai lăng glai tơring glông Sa Thầy hơmâo mơ-it hră ngă kơđi kơ Anom bruă Tơhan pôlih Hơduah ĕp kơđi, Kông an tơring glông Sa Thầy či hơduah ĕp, pơsir kơđi djơ̆ tơlơi phiăn. Bruă anai hơmâo ƀuh ƀơi kual glai yua Kông ti TNHH sa ding kơna đang glai Sa Thầy wai lăng, ƀơi să gah guai dêh čar Mô Rai, tơring glông Sa Thầy.

Anih arăng drôm kyâo

Sa ƀĕ kyâo arăng drôm bơrơbuh.

Anih hơmâo arăng koh drôm kyâo hŭi biă mă, ataih mơng plơi pla laih anun ataih mơng Jơlan 14C năng ai 10 rơwang km. Ƀơi mông ƀuh bruă ngă soh lơ 2/9/2022, tơhan pơgang glai mơng Kông ti wai lăng đang glai Sa Thầy pơsit hơmâo 32 ƀĕ kyâo arăng drôm bơrơbuh, prong rơbêh 40m3, hơmâo djuai kyâo anet prong mơng djuai III truh djuai VII.

Siu H’Mai: Pơblang