Kiăng prăp lui klă kơ hơdôm anom bruă, khul grup, gưl să sit nik mă bruă mơ̆ng lơ 1/7, Ping gah tơring čar Kon Tum git gai hơdôm grup ping gah yua Ping gah tơring čar wai lăng phun; hơdôm Ping gah tơring glông, plơi prong hăng gơnong bruă, anom bruă mơ̆ng tơring čar pơƀut ngă klă bruă dăp glăi anom bruă kơnuk kơna; pơsir hĭ tơlơi tơnap, aka ƀu thâo ngă, tơlơi phrâo hơmâo aka ƀu thâo pơsir đah mơ̆ng pơhlôm ngă bruă tŭ yua.

Ping gah tơring čar Kon Tum jao kơ djŏp gưl lăng glăi, ngă giong bruă iâu mơnuih ngă bruă, anih anom, rơdêh, gơnam yua...pơhlôm ba anom bruă gưl să dưi mă bruă sit nik amăng lơ 1/7; Jao kơ khul khua apăn bruă ping gah Jơnum min mơnuih ƀôn sang tơring čar git gai, črâo bruă lăng glăi abih bruă wai lăng, mă yua anih anom mă bruă, gơnam tam, prăk kăk, lŏn tơnah rơbêh tơdơi kơ pơmut hrŏm hơdôm anom bruă, pơhlôm klă, huăi prai lui khưi khai; Jơnum min pơ ala mơnuih ƀôn sang tơring čar hmao klôn ngă hră pơtrun ruah Khua, Kơ-iăng khua jơnum min pơ ala mơnuih ƀôn sang să; Khua, Kơ-iăng khua sang să či pơphun brơi hră mă bruă sit nik amăng lơ 24/6. Khua ping gah djŏp anom bruă mơ̆ng Ping gah tơring čar Kon Tum Nguyễn Đức Tuy brơi thâo, bruă ječ ameč laih anun kiăng rim čô khua, mơnuih mă bruă khŏm pơtrut pran jua gơgrong ngă bruă, kiăng să, phường phrâo mă bruă tŭ yua.