Sit biă ñu, Jơnum min mơnuih ƀôn sang tơring glông Kon Plông, tơring čar Kon Tum hơmâo hră pơ-ar, rơkâo mơnuih apăn bruă amăng Khul git gai pơhlôm hlâo ayuh hyiăng pơplih sat hăng djru mơnuih laih dong pơgang ba mơnuih ƀôn sang amăng tơring glông hluai tui bruă jao, ječ ameč nao tơl hơdôm boh plơi pla pel ĕp, jŭ yap glăi anŏ răm rai mơng sang dŏ, gơnam tam, hơdôm anih anom mă bruă kiăng kơ hơmâo hơdră rŭ pơdong anŏ răm rai tơdơi kơ lŏn pơpư̆; gum hrŏm hăng Jơnum min mơnuih ƀôn sang hơdôm boh să, tơring kual pok pơhai hơdôm hơdră pơhlôm hlâo kơ lŏn pơpư̆; kiăo tui lăng, pơ alum pran jua mơnuih ƀôn sang hơđong tơlơi hơdip bơwih ƀong huă.

Hơdôm anih anom gah Jơnum min mơnuih ƀôn sang tơring glông hăng Jơnum min mơnuih ƀôn sang hơdôm boh să, tơring kual Măng Đen gơgrong jŭ yap glăi, lăi pơthâo tañ anŏ răm rai mơ-it nao Anom bruă ngă hmua hăng pơđĭ kyar ƀon lan; tŏ tui pel ĕp, lăng glăi tong ten gơnam răm rai hăng rơkâo hơmâo prăk djru rŭ pơdong mơ-it nao Jơnum min mơnuih ƀôn sang tơring glông kiăng sem lăng rơnoh prăk djru rŭ pơdong.