VOV4.Jarai - Mơguah lơ 7/4, ƀơi plơi prong Kon Tum, Anom git gai Iâu pơthưr pơyơr drah tơring čar Kon Tum pơphun “Hrơi abih bang mơnuih nao pơyơr drah thun 2022”. Bruă anai kiăng mơnuih ƀon sang thâo hluh kơ anŏ klă hiam mơng bruă “Pơyơr drah bơhơdip ană mơnuih”.

Nao pơyơr drah tơdơi kơ pơphun jak iâu “Hrơi abih bang mơnuih nao pơyơr drah thun 2022”.

Pơhiăp ƀơi mông ngă bruă, Kơ-iăng khua Jơnum min mơnuih ƀon sang tơring čar Kon Tum Y Ngọc brơi thâo, hơdôm thun rơgao, bruă pơyơr drah djru mơnuih ruă ƀơi tơring čar Kon Tum jing bruă khăp pap, hơdor tơngia biă mă, hơmâo lu mơnuih gum ngă. Kơnong amăng thun 2021 phrâo rơgao, anom bruă ia jrao tơring čar Kon Tum hơmâo mă rơbêh 2.500 anung drah mơng ƀing nao pơyơr drah. Tơdơi kơ pơphun ngă, hơmâo rơbêh 300 anung drah mơng mơnuih ƀon sang tơring čar Kon Tum pơyơr pơgôp brơi “Sang bruă ba hyu drah” bơwih brơi bruă pơjrao mơnuih ruă kraih, hăng pơjrao brơi mơnuih ruă.

Siu H’Mai: Pơblang