VOV4.Jarai - Tơdơi kơ rơbêh 2 thun pơdơi hĭ yua klin Covid-19, ƀơi Kon Tum amăng bơyan pơdơi prong, ƀing čơđai dưi ngui ngor, ngă bruă pơđĭ tui tơlơi rơgơi, tơlơi thâo mơng pô ñu hăng lu bruă jơnum ngui glăk hơmâo pơphun. Truh mông anai, hơdôm anom bruă, sang gru grua ƀơi tơring čar Kon Tum hơmâo pơphun ngă lu bruă ngui ngor bơyan pơdơi prong 2022, laih anun pơphun čơkă ƀing hlăk ai čơđai muai mut hrăm amăng anih pơtô tơlơi rơgơi, tơlơi thâo thăi yang brơi kah hăng: hrăm taih, luai ia, kač rup, hrăm tơlơi Anglê...

Anih hrăm bruă gah grup ƀing čơđai mơng Anom bruă gru grua bơkơjăp drơi jăn Hlăk ai čơđai muai tơring čar Kon Tum.

Him lăng amăng bơyan pơdơi prong anai, mrô čơđai ƀơi Kon Tum hrăm rơguăt tui tơlơi thâo mơng pô gơñu amra lu tui mơn. Amai Nguyễn Thị Tuyết Mai, Khua Anom bruă pơtô pơjuăt pơbuă tui tơlơi rơgơi Khul grup hlăk ai hăng pơtô brơi bruă kiăng hrăm, Anom bruă Gru grua bơkơjăp drơi jăn hăng tuai čuă ngui tơring čar Kon Tum brơi thâo, anom bruă hơmâo prăp lui laih tơdah hơmâo lu čơđai nao hrăm amăng bơyan pơdơi prong anai.

Siu H’Mai: Pơblang