Yua bơbeč djơ̆ mơ̆ng kơthel tal 6 ngă, mơ̆ng čơtlăm lơ 26/10, ƀơi tơring čar Kon Tum hmâo hơjan găp ƀrô, hơjan prong ƀơi lu anih, amăng anun tơring glông Đăk Glei mrô ia hơjan prong hloh mơ̆ng 80-120mm. Hơdôm bôh tơring glông Ia H’Drai, Kon Plông, Đăk Tô, Kon Braih, Ngọc Hồi, Sa Thầy hăng plơi prong Kon Tum mrô ia hơjan hmâo lu ñu mơ̆ng 50-81mm.

Pok pơhai bruă bŏng glăi hăng kơthel tal 6, Jơnum min mơnuih ƀôn sang tơring čar Kon Tum črâo ba 10 bôh tơring glông, plơi prong biă ñu lĕ 3 bôh tơring glông gah Ngŏ, Ngŏ Kơdư mơ̆ng tơring čar, anun lĕ Đăk Glei, Tŭ mrông hăng Kon Plông ngă tui tơpă črâo ba mơ̆ng Gong gai dêh čar, Ding jum gơnong bruă dêh čar hăng mơ̆ng tơring čar kơ kơtưn bruă pơgang kơthel ngă. Lăng tui kơjăp dong tơlơi pơplih hơjan ia ling dăo, ngă tui jơlan gah “4 hơđăp”, prăp lui bŏng glăi, pơsir, hơkrŭ glăi tơdah hmâo tơlơi truh hăng hyu hơduah ĕp mơnuih hmâo tơlơi truh; pok pơhai hơdôm jơlan gah pơgang, pơhlôm gah mơnuih, kông ngăn mơnuih ƀôn sang, pơhlôm hơđong rơnuk rơnua hăng kual ba đuăi mơnuih ƀôn sang./.