VOV4.Jarai - Anom bruă git gai ling tơhan wai pơgang guai tơring čar Kon Tum gum hrŏm hăng djop gưl Ping gah, gong gai ƀon lan hơmâo pơphun ha wŏt Jơlan hwodră “hrơi wai pơgang guai amăng abih bang mơnuih thun 2022” ƀơi 13 boh să giăm guai hăng dua boh dêh čar Lao hăng Kur. Hrŏm hăng anun lăng glăi bruă ngă tui tơlơi črâo trun mơng Kơnuk kơna amăng bruă pơphun abih bang mơnuih gum hrŏm wai pơgang guai lŏn ia, pơhlôm hơđong guai lŏn ia ta, Hrơi ngui kiăng pơpŭ lu hơbô̆ bruă pơđĭ kyar bơwih ƀong huă- mơnuih mơnam, pơplih tơlơi pơmĭn, bruă mă ăt hơmâo pok pơhai djru brơi mơnuih ƀon sang ƀơi kual giăm guai.

Bơk gơnam brơi sang anŏ ƀun rin amăng “Hrơi ngui abih bang wai pơgang guai”

Ƀrô tal anai, Anom bruă git gai ling tơhan wai pơgang guai lŏn ia tơring čar Kon Tum hăng gưl Ping gah, gong gai djop ƀon lan hơmâo jao 2 boh sang gum pơgôp, sa amăng hơdôm hơbô̆ bruă rông rơmô tuh hrôh; 120 anung gơnam ƀơk brơi sang anŏ ƀun rin; jao gơnam, prăk kak djru brơi 90 čô čơđai ƀun rin, laih dong pơpŭ bơni hơdôm pluh khul grup, ƀing mơnuih thâo rơgơi amăng bruă wai pơgang guai lŏn ia.

Siu Đoan: Pơblang