VOV4.Jarai - Tlam tom brơi (15/9), ƀơi sang jưh tuai giang mah, plơi prong Kon Tum, Jơnum min mơnuih ƀon sang tơring čar Kon Tum pơphun glăi jơlan hơdră kơphê anom bơwih ƀong sĭ mơdrô, mơnuih bơwih ƀong sĭ mơdrô tơdơi kơ rơwang gun găn yua klin Covid-19 ngă.

Pơčrông sai hăng khua mua tơring čar Kon Tum amăng jơlan hơdră anom bơwih ƀong sĭ mơdrô, mơnuih bơwih ƀong sĭ mơdrô, ƀing pơ ala brơi anom bơwih ƀong sĭ mơdrô brơi thâo, ƀing gơñu ăt dŏ bưp tơnap tap, anai lĕ hơdôm bruă hơđăp amăng bruă tuh pơ alin hăng pơkra pơjing, sĭ mơdrô, anun lĕ: kaih amăng bruă ngă hră pơ-ar lăi hrŏm, amăng bruă lŏn mơnai hnun mơn; bruă “hăng glông pơ-iă, gah tơgŭ rơ-ơ̆” amăng bruă djru brơi anom bruă tuh pơ alin dŏ mơn ƀơi sa, dua boh ƀon lan, anom bruă. Amăng jơlan hơdră ƀing mơnuih bơwih ƀong sĭ mơdrô ăt tŭ mă tơlơi ƀuăn mơng Khua Jơnum min mơnuih ƀon sang tơring čar Kon Tum kơ bruă amra tŭ mă tơlơi lăi pơthâo hăng pơsir hĭ hơdôm bruă bơdjơ̆ nao bruă tuh pơ alin, bơwih ƀong sĭ mơdrô mơ̆ hơdôm anom bruă čang rơmang djru brơi.

Siu Đoan: Pơblang