Mơguah (17/4), ƀơi plơi prong Kon Tum, Jơnum min mơnuih ƀon sang tơring čar Kon Tum pơphun Jơlan hơdră kơphê anom bơwih ƀong sĭ mơdrô-ƀing bơwih ƀong sĭ mơdrô kiăng tŭ mă hơdôm tơlơi rơkâo bơdjơ̆ nao tơlơi tơnap tap, tơlơi gun găn mơng anom bơwih ƀong sĭ mơdrô, ƀing bơwih ƀong sĭ mơdrô amăng bruă tuh pơ alin hăng sĭ mơdrô ƀơi ƀon lan. Amăng jơlan hơdră, pơ ala brơi hơdôm anom bruă, ƀing bơwih ƀong sĭ mơdrô hơmâo pơlăi nao rai tơpă hăng khua mua Jơnum min mơnuih ƀon sang tơring čar hăng hơdôm gơnong bruă, anom bruă bơdjơ̆ nao amăng tơring čar Kon Tum kơ hơdôm tơlơi tơnap tap, gun găn amăng bruă tuh pơ alin kah hăng bơwih ƀong sĭ mơdrô  ƀon lan.

Tŭ mă tơlơi rơkâo đĭ, Jơnum min mơnuih ƀon sang tơring čar Kon Tum, djop gơnong bruă, anom bruă bơdjơ̆ nao hăng gong gai 10 boh tơring glông, plơi prong amăng tơring čar hơmâo pơsir hĭ hmao tlôn 101 bruă brơi anom bơwih ƀong sĭ mơdrô. Hăng hơdôm bruă dŏ gun găn tơring čar Kon Tum pơsit tơdơi kơ 10 hrơi anom bruă bơdjơ̆ nao kiăng hơmâo hơdră pơsir, mơ-it nao hră pơ-ar lăi glăi anom bơwih ƀong sĭ mơdrô hăng hră lăi pơthâo Jơnum min mơnuih ƀon sang tơring čar kiăo tui lăng, pơƀut glăi.