VOV4.Jarai-Lơ 8/2, 10 boh tơring glông, plơi prong amăng tơring čar Kon Tum pơphun sa amăng plĕ tơgŭ ngă bruă pơkơtưn man pơdong plơi pla phrâo hăng plơi prong phrâo hiam rơgơi akŏ thun phrâo Nhâm Dần 2022. Mông jơnum pơphun mă bruă, pơkơtưn man pơdong plơi pla phrâo hăng plơi prong phrâo hiam rơgơi dưi hơmâo tơring čar Kon Tum pơphun na nao rĭm bơyan či abih ngă yang thun phrâo.

Ƀing khua mua nao jơnum ngă hrom tuh pơkra jơlan tơdơi kơ pơphun mă bruă ƀơi grup 5, tơring kual Đak Hà, tơring glông Đak Hà

Thun anai, bruă mă pơkơtưn nao rai hăng akŏ: “Pơđĭ kyar bruă mă ngă hmua, ming pơkra hiam plơi pla, man pơdong plơi pla phrâo, plơi prong phrâo hiam rơgơi”. Ƀuh rơđah, yua glong bruă kơđi čar hăng lu mơnuih ƀôn sang dong yua ngă hrom, truh ră anai tơring čar Kon Tum hơmâo 35 boh să ngă djơ̆ tơhnal pơtrun plơi pla phrâo, amăng anun hơmâo 3 boh să ngă djơ̆ tơhnal pơkă plơi pla phrâo hiam hloh. Thun 2022 kơtưn kiăng hơmâo dơ̆ng 8 boh să djơ̆ tơhnal pơtrun plơi phrâo hiam.

Nay Jek: Pơblang