Laih jơnum jak iâu djru mơnuih ƀôn sang hơmâo tơlơi truh răm ƀăm yua kơthel mrô 3 ngă, anom bruă ping gah, jơnum min pơ ala mơnuih ƀôn sang, jơnum min mơnuih ƀôn sang, jơnum min djop djuai ania mơnuih mơnam Việt Nam tơring čar Kon Tum hơmâo pơphuntlam lơ 12/9 hơmâo 203 boh sang bruă, anom bruă, sang sĭ mơdrô hăng mơnuih ƀôn sang amăng tơring čar pơčruh hơmâo rơbêh 425 klăk prăk. Hrŏm hăng anun hơmâo 23 boh anom bruă, sang bruă sĭ mơdrô čih anăn rơkâo pơčruh truh 2 klai 65 klăk prăk.

Amăng anun, lu anom bruă, lu plơi pla, sang anŏ mơnuih ƀôn sang, mơnuih apăn bruă kơnuk kơna amăng plơi prong Kon Tum pơčruh hơmâo 400 klăk prăk, tơring glông Đak Tô pơčruh 300 klăk prăk. Hăng pran jua ngă tui pơdjru nao rai tơlơi khăp pap, kah pơpha tơlơi tơnap tap, lu khua mua, mơnuih apăn bruă hăng mơnuih ƀôn sang ƀơi tơring čar Kon Tum ăt hlăk hơmâo bruă ngă hiam pơčruh hrŏm prăk kăk, gơnam pioh ba nao djru kơ mơnuih ƀôn sang pơ kual kơdư dêh čar răm rai kơthel mrô 3 ngă, gơnam djru ječ ameč kah hăng mơnong ƀong huă či yua rim hrơi.