VOV4.Jarai - Tơdơi kơ Kơčăo bruă pơkra ming hiam 31 km jơlan juăt nao rai ƀơi Jơlan prang mrô 24 găn nao tơring čar Kon Tum hơmâo pơkra giong, hơmâo ƀuh bruă mơnuih ƀon sang hơdip ƀơi dua bơnah jơlan kuăi dor lŏn ngă sat kơ ayuh hyiăng laih anun jơlan rơnuk rơnua, gong gai 2 boh tơring glông Kon Plong hăng Kon Braih, tơring čar Kon Tum anih hơmâo Jơlan 24 găn nao glăk wai lăng kơjăp bruă anai. Gong gai dua boh tơring Kon Plong hăng Kon Braih git gai Jơnum min mơnuih ƀon sang hơdôm boh să, tơring kual anih hơmâo jơlan anai wai lăng kơjăp hloh.

Sa anih ană plơi kuăi dor lŏn, pơdong sang giăm jơlan 24 găn nao să Tân Lập, Kon Braih, Kon Tum.

Hăng anih kiăng kuăi dor yua djơ̆ amăng anih arăng čuk pơkra lĕ ƀing khua khŏm pơtô brơi ană plơi hơmâo hră lăi pơthâo, krăp lăng bruă čuk dor. Jơnum min mơnuih ƀon sang tơring glông Kon Braih amăng hrơi blan rơgao hơmâo bơtơhmal 2 čô mơnuih ngă soh gah lŏn tơnah, yua kuăi dor lŏn jing ngă lŏn ƀu djơ̆ tui hơđăp, ngă răm abih.

Siu H’Mai: Pơblang