VOV4.Jarai - Kiăng pơgăn bruă arăng dŏp mă yua čuah, amăng hơdôm thun rơgao, tơring čar Kon Tum hơmâo pơphun iâu pơthưr arăng juă nua gơgrong wai lăng, brơi mă yua hơdôm kual čuah ƀơi ia krông. Rơngiao kơ bruă ngă rơđah rơdông, ƀơi lu anih mă čuah ăt hơmâo mơn tơlơi soh ngă mơnuih ƀon sang hil biă mă. Tơhnal phun ñu lĕ bruă wai lăng arăng kuăi čuah ƀu klă, tap năng hơmâo pô pơdŏp brơi tơlơi soh anai.

Anih kuăi čuah ƀơi ia krông Pô Kô, črăn găn nao plơi Kà Nhảy, să Đak Nông, tơring glông Ngọc Hồi hơmâo Jơnum min mơnuih ƀon sang tơring čar Kon Tum brơi hră mă yua mơng blan 11/2018 kơ kông ti TNHH sa ding kơna Lĩnh Vũ. Tui hăng tơlơi lăi glăi mơng plơi pla, mơng hrơi aka ƀu hơmâo hră sĭ mơdrô, anom bruă anai tŭ kơ kuăi mă čuah, kuăi dor jơlan glông năng ai 100m ter ia krông Pô Kô găn nao lŏn sang mơng 10 boh sang anŏ. Ayong Lê Văn Kha ƀu brơi ôh ngă tui anai lĕ, hơmâo ơi A Veo pô wai lăng luh kuăi čuah iâu arăng nao taih. Ayong Kha brơi thâo, bruă anai truh ră anai aka ƀu pơsir mơn:

“Kâo glăi kâo ƀuh sa glông jơlan tui anun jing kâo mă gong kâo pơgăn hĭ lŏn sang kâo, giong anun ơi A Veo iâu arăng rai taih kâo. Lơ̆m anun hơmâo dua čô mơnuih apăn bruă kơnuk kơna dŏ lăng arăng taih kâo, kâo alah lăi anăn yơh. Kâo lăi pơthâo pơ să, Jơnum min mơnuih ƀon sang să kar hăng pơdŏp brơi mơn, gum gah ơi Veo”.

Sa črăn jơlan giăm ia krông Pô Kô Kông Ti TNHH sa ding kơna Lĩnh Vũ hlong či čuk dor mă ñu.

Mơng tơlơi bơngơ̆t ƀu hơmâo pơgăn hĭ, ră anai djơ̆ anăn brơi mă yua čuah, Kông ti TNHH sa ding kơna Lĩnh Vũ hơmâo lu bruă ngă bơbeč djơ̆ tơlơi hơdip ană plơi kah hăng: ƀu ngă djơ̆ tơlơi pơkă kuăi čuah djơ̆ mông; pơdŭ čuah amăng bơyan phang ngă ƀui, amruih biă mă, bơyan hơjan ngă jơlan glut abih. Tap năng anom bơwih ƀong anai tŭ kơ mă lŏn pơtâo dor hĭ amăng bưng pơđoh ia mơng jơlan Hồ Chí Minh kiăng rơdêh ñu dưi pơgiăng hyu čuah. Ayong Lê Văn Tường hơmâo sang giăm ƀơi lan arăng juăt pơgiăng čuah mơng luh čuah nao pơ jơlan Hồ Chí Minh, bơngơ̆t biă:

“Lêng kơ rơdêh prong soh, rơdêh 4 boh tơkai đuăi hmư̆ tơtar bơ mơtăm, ană bơnai kâo pit mơmot hŭi mơn.Giong anun jing ayuh hyiăng. Sang anŏ gơmơi krư̆ bah amăng na nao, ƀu khin pok dong tah. Gah anăp sang hơmâo jơlan Hồ Chí Minh, hlâo adih hơmâo tap rơnap pơtâo, ră anai rơdêh mut nao mă čuah jing pơčah hĭ abih. Pơgiăng lŏn, pơtâo ngă dor abih amăng bưng, jing hơjan ia ƀu thâo rô đuăi dong tah, ia blai đĭ ƀơi jơlan giong anun mut nao amăng sang”.

Kông ti TNHH sa ding kơna Lĩnh Vũ dor hĭ amăng bưng pơđoh ia Jơlan Hồ Chí Minh kiăng rơdêh thâo nao rai pơgiăng čuah.

Hrŏm hăng bơbeč djơ̆ tơlơi hơdip mơnuih ƀon sang, ƀơi hơdôm anih mă čuah ƀơi tơring čar Kon Tum ăt hơmâo lu tơlơi soh prong biă.

Hmư̆ hing kah hăng ƀơi anih mă čuah, pơtâo anet ƀơi ia krông Đăk Pxi, gah thôn 7, să Đăk Pxi, tơring glông Đăk Hà. Tui Hră brơi mă yua pơtâo čuh mrô 898, lơ 15/9/2022 Jơnum min mơnuih ƀon sang tơring čar Kon Tum brơi, kông ti TNHH 87 kơnong dưi mă yua pơtâo čuah tui hơdră ƀŏp hrip mă đôč.

Samơ̆ anom bơwih ƀong anai mă yua rơdêh nao kuăi dor sa boh jơlan glông hơdôm rơtuh met pơčlah hĭ ia krông či kuăi hrip mă čuah, ngă pơplih glông ia rô. Tơlơi phara lĕ mah anih mă čuah ataih mơng Jơnum min mơnuih ƀon sang să Đăk Pxi năng ai rơbêh 1km, samơ̆ ơi Trần Phước Tuấn, Khua Jơnum min mơnuih ƀon sang să pơsit ƀu ƀuh anŏ soh glăi ôh:

“Ƀơi să anai hơmâo git gai na nao yơh kơ adơi ayong, nao sem lăng mơ̆ ƀu ƀuh tơlơi soh hơget ôh”.

Jơlan hơmâo pơkra tong krah ia krông Đăk Pxi yua Kông ti TNHH 87 pơkra či nao kuăi čuah.

Gah Anom bruă kông ngăn lŏn tơnah hăng ayuh hyiăng tơring glông Đăk Hà, ơi Đinh Khánh Hoàng, kơ-iăng khua anom bruă brơi thâo, ƀơi anih mă čuah gah ia krông Đăk Pxi, thôn 7, să Đăk Pxi mơng Kông ti TNHH 87, anom bruă hơmâo ƀuh mơn tơlơi soh, samơ̆ pap brơi mơn kơ anom bơwih ƀong anun Anom bruă kơnong pơtă pơtăn đôč:

“Bơhmutu gơñu kơnong rơkâo mă yua rơkĭ, song, măi hrip pơtâo čuah đôč, samơ̆ djơ̆ hrơi ñu hơmâo ba nao rơdêh guăi, jing gơmơi ngă hră pơtă pơtăn lu wơ̆t mơn. Ăt hơmâo mơn bruă pơkra jơlan kiăng rơdêh trun nao, gơmơi hơmâo lăi yơh, giong anun ăt kiăng Jơnum min mơnuih ƀon sang să nao lăng mơn. Truh ră anai ăt aka ƀu bơtơhmal djơ̆ hlâo dơi ôh”.

Lơ̆m anun, lơ̆m pel ĕp hră brơi mă yua čuah hăng rup phin mơng anih mă čuah, ơi Võ Thanh Hải, Kơ-iăng khua Gơnong bruă kông ngăn hăng ayuh hyiăng tơring čar Kon Tum pơsit, hơdôm tơlơi soh ƀơi anih mă čuah prong biă mă, khŏm lăng glăi tong ten mă glăi hră brơi kuăi pơtâo čuah:

“Amăng tơlơi pơkă hơmâo lăi laih, ƀing gih kơnong dưi ƀŏp, hrip mă đôč, ƀu dưi ba nao măi mok nao kuăi trun dlăm amăng ia krông ôh, kuăi čuah đôč ƀu brơi lơi, kơnong dưi ƀŏp đĭ hăng song, mơng song ba nao pơ anih tuh čuah. Pơkra jơlan pơ tong krah ia krông tui anun soh yơh, tơlơi anai ngă sat kơ ayuh hyiăng lŏn tơnah, ngă soh amăng bruă mă pơtâo čuah. Soh abih yơh, bruă anai khŏm mă glăi hră brơi mă bruă”.

Tơlơi pơhing mơng Gơnong bruă kông ngă lŏn tơnah hăng ayuh hyiăng tơring čar Kon Tum brơi ƀuh, bruă jao wai lăng mă yua pơtâo čuah ƀơi tơring čar Kon Tum rơđah rơđông laih. bruă wai lăng kơjăp mơn. Amăng hrơi 3 rim wơ̆t hrơi tơjuh, rim blan, hăng 3 blan tal 1 Jơnum min mơnuih ƀon sang hơdôm boh tơring glông, plơi prong lêng lăi pơthâo glăi hăng Gơnong bruă kông ngăn lŏn tơnah hăng ayuh hyiăng kơ bruă wai lăng mơng tơring čar. Samơ̆ sit biă ñu hơdôm tơlơi hơmâo ƀơi anih mă čuah či Kon Tum brơi ƀuh, bruă wai lăng arăng mă čuah, mơng hlâo laih hơmâo jao kơ hơdôm anih glăk bưp tơlơi arăng wai lăng ƀu klă, tap năng hơmâo pô pơgang brơi, pơdŏp brơi tơlơi soh glăi anai.

Khoa Điềm: Čih - Siu H’Mai: Pơblang