Ƀrô hơdor glăi tal 98 thun Hrơi hră pơhing hơkrŭ Việt Nam, lơ 21/6/1925-lơ 21/6/2023, mơguah lơ 20/6, kông an tơring čar Dak Lak jơnum bưp ƀô̆ mơta khua mua pơ ala djop sang bruă čih tơlơi pơhing hăng pôr tơlơi pơhing dŏ mă bruă ƀơi tơring čar. Pơ anai, Khua mua kông an Dak Lak brơi thâo hơmâo mă pơkong 74 čô mơnuih pơdjơ̆ nao bruă kơsung blah ngă sat sang bruă 2 boh să ƀơi tơring glông Čư̆ Kuin phrâo anai.

Ƀơi mông bưp, Thiếu tướng Lê Vinh Quy, Khua sang bruă kông an tơring čar Dak Lak, lăi pơthâo tơlơi pơhing, tơdơi kơ hơmâo tơlơi sa khul mơnuih soh sat kơsung blah Jơnum min mơnuih ƀôn sang dua boh să Ea Tiêu hăng Ea Ktur tơring glông Čư̆ Kuin mlam lơ 11/6, ngă kơ dua čô khua apăn bruă să, 4 čô kông an djai pơsăn drơi hăng 2 čô kông an pơkŏn rơka, 3 čô mơnuih oôn sang djai yua; truh ră anai, kông an hơmâo mă pơkong truh 74 čô mơnuih pơdjơ̆ nao. Ră anai, bruă mă tơña tơlơi soh hăng kiăo mă dơ̆ng ƀing soh ăt dŏ hlăk ngă tui đôč. Kông an tơring čar ăt hlăk ngă hrom lu tơhan djop sang bruă kơnuk kơna djru pơgang tơlơi rơnuk rơnua, kơtưn pơtô lăi mơnuih ƀôn sang kiăng hơđong tơlơi pơmin pran jua, mă bruă ngă hmua, bơwih ƀong huă đôč.