VOV4.Jarai - Hăng pran jua gum hrom anom bơwih ƀong, Jơnum min mơnuih ƀôn sang tơring čar Kontum phrâo pơphun Jơnum bơkơtuai hăng anom bơwih ƀong. Rơbêh kơ 10 tơlơi gum pơhiăp ƀơi anăp hăng 32 tơlơi gum pơhiăp hăng hră pơ-ar mơ-ĭt kơ Khua Jơnum min mơnuih ƀôn sang tơring čar Kontum amăng mông bơkơtuai brơi ƀuh, ƀut tơlơi mơ̆ hơdôm bôh anom bơwih ƀong glăk ngă rai gơnam, sĭ mơdrô gơnam ƀơi Kontum bưp tơlơi kaih amăng pơsit kual pơkă hrom hăng hơdôm tơlơi gun bơdjơ̆ nao lŏn dron.

Ơi Nguyễn Ngọc Sâm, Kơ-iăng Khua Jơnum min mơnuih ƀôn sang tơring čar Kontum lăi glăi tơlơi anom bơwih ƀong bơdjơ̆ nao bôh yôm pơkă kual mă yua lŏn

Hrom hăng anun hơdôm tơlơi gun phrâo hmâo lơm hyu hơduah ĕp, apah yua dlai kiăng pla phun jrao hăng pơlar bruă tuai čuă lăng dlai tlô ăt ngă mơn sa dua rơwang bruă bưp tơnap, kaih rơnoh bruă. Khul bơwih ƀong hlăk ai Kontum ăt lăi đĭ mơn 11 mơta tơlơi rơkâo đĭ hăng Jơnum min mơnuih ƀôn sang tơring čar. Amăng anun đing nao pơtlaih tơnap kơ anom bơwih ƀong jing ngăn rơnoh hơkrŭ glăi, pơđĭ kyar bơwih ƀong. Hrom hăng anun ngă gal brơi kiăng anom bơwih ƀong hmâo lŏn tuh pơplai pơđĭ kyar bơwih ƀong sĭ mơdrô. Djă pioh hơdôm tơlơi gum pơhiăp, ba tơbiă mơng anom bơwih ƀong, pô tuh pơplai, khua tơring čar rơkâo hơdôm gơnong bruă, tŭ mă, ruah mă hơdôm tơlơi gum pơhiăp, ba tơbiă kiăng pơphô mă yua hơdră pơkă, hơdră bruă gah pô dưi; ruah mă, lăi pơthâo kơ Kơnuk kơna sa dua mơta tơlơi bơwih ƀong rơkâo đĭ, ba tơbiă djru anom bơwih ƀong yak rơgao tơnap, hơkrŭ glăi bruă bơwih ƀong sĭ mơdrô, anăp nao tơhnal pơđĭ kyar kơjăp phik./.

Siu H’ Prăk: Pơblang