VOV4.Jarai - Ƀơi tơring čar Kontum lu tơlơi pơphun kiăng kơ bơwih brơi Tết kơ mơnuih ƀon sang. Jơnum min mơnuih ƀon sang tơring čar ăt pơsit djru brơi hơdôm sang anŏ ƀun rin hăng giăm ƀun rin čơkă thun phrâo Nhâm Dần 2022. Tui anun, abih tih rơnoh prăk mơ̆ tơring čar Kontum djru brơi sang anŏ ƀun rin hăng giăm ƀun rin čơkă thun phrâo Nhâm Dần 2022 lĕ giăm 16 klai prăk. Amăng anun djru brơi sang anŏ ƀun rin lĕ 600.000 prăk hăng sang anŏ giăm ƀun rin lĕ 300.000 prăk.

Ling tơhan wai pơgang guai tơring čar Kontum jao prăk djru hrăm hră kơ ƀing čơđai sang anŏ tơnap tap ƀơi să Đăk Plô, tơring glông Đăk Glei

Ƀơi tơring čar Kontum amăng hơdôm hrơi anai ăt glăk pơphun lu bruă kiăng kơ bơwih brơi Tết kơ mơnuih ƀon sang, biă mă ñu lĕ mơnuih kual ataih, asuek, kual mơnuih djuai ania ƀiă hăng giăm guai lŏn ia. Truh ră anai hơdôm rơbâo anung gơnam hơmâo jao tơl tơngan djop sang anŏ ƀudah ƀing čơđai sang hră sang anŏ tơnap tap. Jơlan hơdră “Bơyan bơnga giăm guai ngă pơđao pran jua ană plơi pla”, “Gum hrŏm hăng đah kơmơi giăm guai”, “Hrơi ngui hơtuk ƀañ tek” …hơmâo pơphun mơng hrơi anai truh hơdôm hrơi giăm ƀong tết kiăng kơ ngă bơyan bơnga ngui tum jơngum mơ-ak, khăp pap tơdruă.

Siu Đoan: Pơblang