VOV4.Jarai - Mơguah lơ 2/6, ƀơi tơring glông Đăk Hà, Khul hlăk ai tơring čar Kontum pơphun ngă Lơphet pok phun Bruă hlăk ai hyu gum djru bơyan pơdơi prong thun 2022. Bruă anai hmâo hơdôm bruă mă kah hăng: Mơnuih amăng khul, ƀing tơdăm dra gum hrom pơdŏng plơi pla phrâo, pơgang anih anom dô̆, bŏng glăi hăng pơplih ayuh hyiăng; Bơwih brơi kơ čơđai muai, gum hrom djru mơnuih ƀôn sang bơbeč mơng klin ruă Covid-19;

Kontum pok phun bruă Hlăk ai hyu gum djru bơyan pơdơi prong thun 2022

Lăi pơhing Tơlơi phiăn hlăk ai; pơphun pơmut mơnuih mut amăng khul, mơnuih mut khul phrâo... Amăng mông ngă lơphet pok phun, Khul hlăk ai tơring čar Kontum ƀơk 50 anung gơnam kơ ƀing čơđai sang hră tơnap tap hrưn đĭ hrăm rơgơi; ƀơk anung gơnam kơ 10 bôh sang anô̆ hlăk ai djuai ania ƀiă hăng tui đăo tơnap tap; Jao hơdră pơgăn djah kơ su, pơhrui duñ djah ƀơi plơi pla hăng hơdră đang phun pla pioh bơwih ƀong, ngă juăt hăng pơplih ayuh hyiăng; ƀơk 1000 kơčok ia tơsâu rơmô kơ čơđai hmâo tơlơi hơdip tơnap; bơni apah pri 9 grŭp hăng 9 čô mơnuih hmâo bôh than prong amăng pok pơhai hơdôm bruă mă Blan Hlăk ai thun 2022.

Mơguah lơ 2/6, ƀơi plơi prong Pleiku, Khul hlăk ai tơring čar Gia Lai pơphun “Bruă gum djru mơng hlăk ai amăng bơyan pơdơi prong thun 2022” hơmâo 350 čô hlăk ai mut hrŏm. Tal pơphun thun anai, Khul hlăk ai tơring čar Gia Lai hơmâo akŏ pơjing 5 grup hlăk ai hyu gum djru mơnuih mơnam, pơphun hơdôm bruă mă amăng 3 blan amăng bơyan pơdơi prong anai. Hơdôm bruă mă, ring bruă tong ten djru brơi hơdôm să giăm guai hăng hơdôm să, plơi pla glăk gir run man pơdong plơi pla phrâo amăng thun 2022. Tal pơphun anai, hlăk ai Gia Lai gir run pơkra ming, pơkra phrâo 15 km jơlan amăng plơi pla; pla phrâo 150.000 phun kyâo; man pơdong 3 boh sang khăp pap; khăm, črâo brơi bruă mơñum ƀong kiăng bơbuă amăng drơi jăn, pơhlôm gơnam ƀong hơdjă brơi ƀiă biă mă 1.000 čô mơnuih; man pơkra phrâo hăng pơkra ming 8 boh sang juă glai ƀơi sang hră; pơtô brơi hlăk ai pơphun bruă mă. 

Siu H’ Prăk - Siu Đoan: Pơblang