VOV4.Jarai - Ƀơi anăp tơlơi ngă hơƀak ƀơi kual dưm djah hơđăp pơ̆ Sang măi pơsir djah khăng Đăk Hà, Gơnong bruă wai lăng lŏn drŏn hăng rơhuông adai anih anom dô̆ tơring čar Kontum rơkâo Sang bruă anai ngă tui hơdôm jơlan pơsir kiăng pơhlôm anih anom dô̆.

Sa anih dưm djah hơđăp ngă hơƀak

Kiăo tui anun, Sang bruă bơwih ƀong mơnuih ƀôn sang sĭ mơdrô hăng hơdră phrâo măi mok rơhuông adai DH (Anom pô wai lăng Sang măi pơsir djah) khom ba abih bang mrô djah pơđăm ƀơi anih dưm djah hơđăp nao pơ̆ kual sang pơđăm ƀudah hmâo jơlan gah pơgăn bĕ tơlơi ia hơjan hram găn nao laih anun rô tơbiă gah rơngiao. Kuăi huê̆t glut hlŭ ƀơi anih dưm ia mơng djah djâu hơđăp kiăng hmâo dong anih dưm djah; Ngă kơjăp hăng pơkra brô̆ đĭ kueng dơnao ia pơhlôm huăi hram hyu gah rơngiao ƀudah pơčah dơnao ia lom hmâo hơjan prong; Hmâo jơlan gah djơ̆ kiăng pơhrui abih bang ia djah phrâo hmâo mơng anih dưm djah hơđăp; Kơtưn pruih jrao ƀơi kual dưm djah kiăng plai ƀiă ƀâo brŭ, ruai keč čeh čar lar djuai./.

Siu H’ Prăk: Pơblang