VOV4.Jarai - Ƀơi tơring glông Tŭ Mrông, tơring čar Kontum hơjan prong sui hrơi rơgao hmâo ngă lŏn tơhlom, răm rai sa dua glông jơlan. Ră anai, Gong gai plơi pla glăk hơkrŭ pơkra tañ pơhlôm bruă nao rai hăng hơđong tơlơi hơdip mơda mơnuih ƀôn sang.

Hlă hnal lăi pơthâo ƀơi sa anih anom lŏn tơhlom

Ƀơi anăp kiăng pơhlôm bruă nao rai mơng mơnuih ƀôn sang, ƀơi hơdôm anih anom lŏn tơhlom prong ƀơi jơlan nao pơ̆ 4 bôh să gah Yŭ tơring glông Tŭ Mrông, Gơnong bruă man pơkra mơng tơring glông gum hrom hăng Jơnum min mơnuih ƀôn sang hơdôm bôh să pơphun hlă hnal lăi pơthâo ƀơi hơdôm kual huĭ rơhyư̆t; pơkiăo nao khul mơnuih dô̆ gak pơtô brơi mơnuih hăng rơdêh nao rai ƀơi anih lŏn tơhlom kiăng pơhlôm.

Sa anih lŏn tơhlom prong ƀơi jơlan nao pơ̆ 4 bôh să gah Yŭ tơring glông Tŭ Mrông

Hăng hơdôm anih răm rai ƀơi jơlan amăng plơi pla, să, tơring glông Tŭ Mrông iâu pơhrui rơdêh măi mok, mơnuih mă bruă kiăng pơkra kơjăp, pơgăn bơnư̆ ƀu pioh bơdjơ̆ nao bruă nao rai mă bruă mơng mơnuih ƀôn sang./.

Siu H’ Prăk: Pơblang