VOV4.Jarai - Akă truh 1 blan dong lĕ pơphun tal pơplông mă ƀăng gưl 3, ƀơi tơring čar Kontum amăng rơwang ječ anai, hơdôm bôh anom sang hră glăk kơtưn pơhrăm glăi brơi kơ čơđai tơlơi hrăm hăng prăp lui pran jua djru čơđai sang hră phing kơ pran jua hloh pioh pơplông. Tal pơplông mă ƀăng gưl 3 thun anai tơring čar Kontum hmâo rơbêh kơ 4.700 čơđai sang hră ngă hră rơkâo pơplông. Kiăng thâo sit bôh thâo mơng rim čơđai sang hră, Gơnong bruă pơtô pơhrăm tơring čar Kontum črâo ba hơdôm bôh sang hră pơphun brơi abih bang čơđai anih 12 pơplông lông lăng kiăng pơblang, pơsit, pel ĕp glăi kiăng hmao pơhrua nao, pơplih pơkra bôh yôm pơhrăm glăi rim mơta tơlơi hrăm djru čơđai sang hră amuñ djă pioh tơlơi hrăm hăng thâo kơjăp bôh thâo. Gơnong bruă pơtô pơhrăm tơring čar Kontum pơkă hlâo pơdŏng 12 bôh anom pơplông, hăng 203 bôh anih pơplông, 41 bôh anih dô̆ tơguan hăng pơhlôm hlâo. Kiăng tal pơplông pơphun pơhlôm, tơpă, djơ̆ tơlơi pơkă, Grŭp črâo ba tal pơplông mă ƀăng gưl 3 thun 2022 tơring čar Kontum ăt hmâo ba mơn jơlan gah pơhlôm kơ čơđai pơplông kual asuek, ataih lom nao pơplông hăng anih dô̆, anih ƀong huă pơdơi pơdă. Pơpha hơdôm anih anom pơplông djơ̆ hăng bôh nik hmâo hăng gêh gal kơ čơđai sang hră./.

Siu H’ Prăk: Pơblang