VOV4.Jarai - Tơdơi hơdôm bơyan pơdơi prong biă ñu dô̆ ƀơi sang kiăng pơgang pơhlôm hlâo klin Covid-19, bơyan pơdơi prong thun anai ƀing čơđai tơdăm ngek dra muai, ƀơi tơring čar Kontum hmâo gum hrom laih hơdôm bruă mă mơ̆ pô hor. Thâo kơ tơlơi anai, hơdôm bôh Anom, Sang Bôh thâo, khul grŭp, mơnuih ƀôn sang ƀơi Kontum hmâo pơjing laih lu anih anom ngui ngor kiăng čơđai hmâo dong anih ruah mă pioh pơdah bôh thâo mơng pô.

Ƀu lăng kơ ayuh hyiăng pơ-iă hang hiưm hơpă ôh, grŭp čơđai năng ai ñu hmâo 30 čô čơđai sang hră mơng anih 6 truh anih 8, Sang hră gưl 2 Nguyễn Sinh Sắc ƀơi plơi prong Kontum hor kơ pơhrăm bôh thâo bruă Grŭp. Adơi Lã Đinh Hòa An, čơđai sang hră anih 6Y, brơi thâo ñu ƀuh pô hmâo bôh thâo anun rơkâo gum hrom pơhrăm anih bôh thâo bruă mă Grŭp yua kơ Anom bôh thâo bơkơjăp drơi jăn hlăk ai, tơdăm ngek dra muai, čơđai muai tơring čar Kontum pok amăng tal pơdơi prong. Hăng Lã Đinh Hòa An, bơyan pơdơi prong anai hmâo lu tơlơi mơ-ak hăng pha ra biă:

“Bơyan pơdơi prong anai ƀing gơmơi dưi tum pơƀuth kiăng gum hrom hơdôm bruă tŭ yua lĕ ƀing gơmơi ƀuh mơ-ak biă yua kơ tơdơi kơ 2 thun Covid ngă lĕ dưi nao rai gum hrom kiăng pơwot glăi bruă mă. Dưi bưp glăi lu gơyut gơyâu, bơkơtuai hăng lok glăi hơdôm tal hơdor glăi mơ̆ pô hmâo lui lơi laih amăng hơdôm tal Covid. Tal pơdơi prong anai rơngiao kơ anih hrăm anai kâo ăt amra gum hrom mơn sa dua bruă mă kah hăng pơhrăm pơtaih, pơhrăm luai ia hăng ăt kah hăng pơhrăm bôh thâo pô hmâo”.

Ƀing čơđai muai pơhrăm atông hơgor, anih pơtô bôh thâo bruă mă grŭp

Klin ruă Covid-19 dưi wai lăng, bơyan pơdơi prong anai pơđom pioh bruă pơwot glăi mơng lu anih anom ngui ngor pioh kơ čơđai muai hăng đing nao lu hloh ƀơi plơi prong Kontum. Hrom hăng hơdôm anih pơtô pơhrăm bôh thâo mơng hơdôm bôh Anom, Sang jơnum bôh thâo, ƀing amĭ ama čơđai ăt dưi ruah mă mơn hơdôm anih hrăm pô thâo yua kơ khul grŭp, mơnuih ƀôn sang pok kiăng djru ană bă pô pơdah pô thâo pô. Amai Đặng Linh Ngọc, amĭ Nguyễn Đặng Gia Hân, 6 thun, sang dô̆ ƀơi Ƀut mrô 1, phường Duy Tân brơi ană gum hrom anih pơhrăm bôh thâo suang ƀơi jơlan Hoàng Thị Loan, brơi thâo:

“Lăng ƀuh ñu dô̆ pơ̆ sang ăt hmâo tơlơi thâo thăi mơn gah tơlơi hrăm kah hăng suang, adôh hăng kač rŭp. Ƀing čơđai giong hrăm ƀơi sang hră, rơngiao kơ hrơi dô̆ pơ̆ sang lĕ ăt kiăng ƀing čơđai nao mơn pơ̆ anom bruă mơ̆ ngui rah pơhrăm pô rah. Dua lĕ ƀing čơđai dưi pơhrăm drơi jăn, pơhrăm tơlơi suaih pral amra klă hloh lĕ bruă ƀing čơđai dô̆ pơ̆ sang. Ăt hmư̆ mơn ƀing amĭ ama čơđai pơkon lăi pơthâo kơ anom anai, anun kiăng kơ ană kâo gum hrom kiăng dưi pơdah bôh thâo mơng drơi pô.”

Anih pơtô luai pơgang hlôm hlâo huĭ ia ƀlung mơng Anom bruă bôh thâo bơkơjăp drơi jăn hlăk ai tơdăm ngek dra muai čơđai muai tơring čar Kontum

Tal bơyan pơdơi anai, hrom hăng hơdôm anih hrăm bôh thâo, tal hrăm bôh thâo, anih anom tum pơƀut jing juăt laih, kah hăng: kač rŭp, gông Organ, hrăm pơtaih ... ƀing čơđai muai ƀơi Kontum dô̆ hmâo hơdôm tơlơi ruah mă phrâo biă, kah hăng: Jơlan hơdră găn rơgao ƀơi dlai tlô; Sang dô̆ hlăk muai; Suang tik tok... Hăng ƀơi anăp tơlơi kiăng pơhrăm pô, pơdah bôh thâo mơng čơđai muai, ƀơi tơring čar Kontum rơngiao kơ hơdôm hơdră dăp bôh thâo mơng Kơnuk kơna tal bơyan pơdơi prong anai dô̆ djă pioh tơlơi gum hrom mơng lu khul grŭp, mơnuih amăng bruă pơphun hơdôm anih anom ngui ngor kơ čơđai muai. Tui hăng ơi Phạm Văn Thắm, Kơ-iăng Khua Anom bôh thâo bơkơjăp drơi jăn hlăk ai tơdăm ngek dra muai čơđai muai tơring čar Kontum, anai lĕ gru nam klă pơjing tơlơi lu mơta, dưi bơkơtưn klă hăng pô dưi čơkă mă bôh tŭ yua lĕ ƀing čơđai muai:

“Anun lĕ pơplih phrâo gah bôh thâo mơnuih mơnam. Djơ̆ mơng lăi lĕ bôh thâo arăng ngă bruă bôh thâo hă lu biă. Anih pơtô pĕ gông, anih pơtô adôh, anih pơtô suang.Gah rơngiao ngă ƀu djơ̆ rơgao hăng 10 thun kơnong kơ hmâo Anom bruă ƀu pơjing rai sa tơlơi bơkơtưn ôh. Khom tuh pơplai klă gah gơnam mă yua, ană mơnuih anun kah mơng ngă pơhư̆č čơđai muai. Hăng hrăm bôh thâo pô thâo ăt lĕ rŏng gơgrong mă mơn, ƀu djơ̆ hmâo hlơi pơgô̆ ôh. Hăng hrăm bôh thâo mơng pô ăt lĕ rŏng hrăm mă pô, ƀu hmâo hlơi pơgô̆ ƀing čơđai ôh.”

Tơdơi hơdôm bơyan pơdơi prong biă ñu dô̆ amăng sang kiăng pơgang hlôm hlâo klin Covid-19, bơyan pơdơi prong thun anai ƀing čơđai muai ƀơi tơring čar Kontum hmâo gum hrom laih hơdôm bruă mă đing nao mơ̆ pô hor. Hơdôm anih hrăm bôh thâo, bruă mă găn rơgao ră anai glăk hmâo mrô čơđai muai gum hrom klă hloh. Hơdôm bôh Anom, Sang bôh thâo hrom hăng sa dua khul grŭp, mơnuih ƀôn sang ƀơi tơring čar Kontum ăt glăk anăp nao mơn hơdôm bruă mă kơ hơdôm tơring glông kual ataih kiăng pơjing dong lu anih anom ngui ngor kơ čơđai muai tal bơyan pơdơi prong anai./.

            Khoa Điểm: Čih – Siu H’ Prăk: Pơblang