VOV4.Jarai - Kiăng pơhlôm jơlan nao rai amăng bơyan hơjan ia ling dăo thun anai, ră anai Gơnong bruă jơlan nao rai dŭ pơgiăng hăng gong gai 10 bôh tơring glông, plơi prong mơng tơring čar Kontum glăk pơtrut tañ bruă pơkra glăi, rŭ pơdŏng glăi hơdôm anih anom lŏn tơhlom hmâo pơpha laih prăk mă yua.

Sa anih lŏn tơhlom kiăng tañ rŭ pơkra glăi ƀơi tơring glông Đăk Glei tơring čar Kontum

Hrom hăng anun kơtưn bruă hyu tir, pel ĕp, pơsit hơdôm anih anom amra hmâo lŏn tơhlom ƀơi hơdôm ară jơlan kiăng hlă hnal lăi pơthâo kơ mơnuih ƀôn sang thâo pioh pơhlôm hlâo. Hơdôm bôh anom, plơi pla ăt gơgrong hlâo mơn jơlan gah bŏng glăi, prăp lui măi mok, mơnuih mă bruă kiăng djru pơtlaih hăng rŭ pơdŏng pơkra glăi anô̆ răm rai lom hmâo hơjan ia ling dăo. Kiăng pơhlôm brơi jơlan nao rai amăng tơring čar, dong mơng hlâo kơ bơyan hơjan ia ling dăo thun anai mơtăm, Gơnong bruă jơlan nao rai dŭ pơgiăng tơring čar Kontum ăt hmâo prăp lui mơn giăm truh kơ 300 rô dưm bôh pơtâo, năng ai ñu 1.400 m3, 1 glông tơdrông toa yôl hăng 3 glông tơdrông toa hrĕ kuăt prăp lui pok pơhai hơkrŭ pơsir lom hmâo tơlơi răm rai yua kơ hơjan ia ling dăo ba truh hăng hơdôm ară jơlan nao rai./.

Siu H’ Prăk: Pơblang