VOV4.Jarai -  Ngă tui Jơlan hơdră pơkă mơng lŏn ia “Rim să sa gơnam tam” OCOP, thun 2021 tơring čar Kontum pơdŏng hmâo laih 58 mơta gơnam tam đĭ tui mrô gơnam OCOP mơng tơring čar truh 146 mơta gơnam hăng leng kơ djơ̆ hăng mơng 3 truh kơ 5 bôh pơtŭ. Amăng hơdôm hrơi tơnap tap, bơbeč mơng klin ruă Covid-19, hơdôm pô gơnam OCOP, gơnong bruă đang hmua tơring čar Kontum hmâo laih lu tơlơi pơčeh phrâo amăng tô nao rai, sĭ gơnam ngă brơi gơnam djru pơplih phrâo tơlơi hơdip mơnuih ƀôn sang ƀơi plơi pla.

Să Đăk Pxi, tơring glông Đăk Hà, tơring čar Kontum hmư̆ hing hăng gơnam OCOP rơbung ale dlai phang krô. Thun 2021 mơnuih ƀôn sang amăng să hyu wok rơbung, phang krô năng ai ñu 12 tơn rơbung ale krô sĭ kơ arăng blơi. Amăng hơdôm hrơi klin ruă Covid-19 ngă tơnap, gơnam OCOP rơbung ale krô mơng să Đăk Pxi ăt dưi hmâo mơnuih blơi yua čơkă blơi mơn. Ayong A Sáo, plơi Kon Pao Kla, brơi thâo, gơnang kơ gum hrom ngă rai gơnam OCOP dưi pơđĭ tui nua gơnam, mơnuih ƀôn sang amăng să hmâo dong prăk pơhrui glăi pơplih phrâo tơlơi hơdip mơda mơng anun jai bơwih brơi tŏng ten hloh gơnam mơng pô:

“Pơphun mơng blan 7 neh wa hyu dlai wok rơbung ale. Neh wa pơkra mă rơbung ale krô. Kiăng hmâo gơnam hơdjă, klă, hiam sĭ kơ dêh čar tač rơngiao, tơdơi kơ wok rơbung ale kiăng tañ kuah abih kơđuh hăng khom hơtuk mơtă. Laih anun mă tơbiă trăm hăng ia rơ-ơ̆, rao rơgoh, blah jing anet čơhmu krô amăng pơ-iă ƀudah phang krô hăng hơdăng apui. Hlâo kơ anung amăng hruh khom lui hĭ hơdôm rơbung ƀu hiam, ruah mă hơdôm čơđeh jơman hloh pô blơi mơng hor, ƀong mơng jơman. Neh wa hmâo prăk pơhrui glăi mơng rơbung ale anun jai hor pơkra rơbung, jai hmâo bruă gơgrong”.

Pơđĭ kyar kual pla gơnam tam pioh pơkra gơnam OCOP ƀơi tơring glông Đăk Tô

Thun 2021 amăng hơdôm hrơi klin ruă Covid-19 ngă tơnap, hơdôm bôh anom bơwih ƀong, anom mă bruă hrom, sang anô̆ bơwih ƀong sĭ mơdrô mơng tơring čar Kontum ăt dưi pơdŏng mơn 58 mơta gơnam OCOP hăng gơnam hmâo hơđăp ƀơi tơring čar. Amăng anun ƀuh rơđah hloh lĕ djuai gơnam pơkra mơng sâm Ngọc Linh, kơ phê, sâm hrĕ, bôh troh... Amai Hồ Thị Kim Oanh, Khua Sang bruă pơčruh prăk hrom bơwih ƀong sĭ mơdrô – Pơkra hăng sĭ gơnam Lâm Thịnh, ƀơi tơring glông Đăk Tô brơi thâo, anom bơwih ƀong hmâo pơdŏng laih trà sâm hrĕ Ngọc Linh dăp tal 3 bôh pơtŭ hăng glăk ngă giong glông bruă pơkra sa dua mơta gơnam tam pơkon.

“Sang bruă phrâo gum hrom amăng jơlan hơdră OCOP. Lom ba nao sĭ gah pran bơkơtưn sĭ mơdrô bơhmu hăng hơdôm anăn păn gơnam tam pơkon gơñu hmâo tơhnal sĭ mơdrô sui laih lĕ, bơhmu biă ñu dô̆ ataih biă. Tơdơi kơ 2 thun gum hrom amăng jơlan hơdră OCOP ngă gru dưi pơđĭ tui lu biă. Gah tơhnal sĭ mơdrô đĭ tui ƀiă biă mă ñu 50% gah pran bơkơtưn, gah gru ñu kơđuh anung laih anun anô̆ klă gơnam tam. Lom ta lăi pơthâo hơdôm mơta gơnam sĭ mdrô tui jơlan điện tử Shopee ta ăt ƀu pha ra mơn hăng hơdôm mơta gơnam tam pơkon”.

Sa bôh anih sĭ gơnam lăi pơthâo gơnam OCOP ƀơi plơi prong Kontum

Yap truh abih thun 2021, tơring čar Kontum hmâo pơdŏng laih 146 mơta gơnam tam OCOP dăp mơng 3 truh kơ 5 bôh pơtŭ. Kiăng pơsit anăn păn, pơđĭ tui nua gơnam tam, bruă tô nao rai anih anom sĭ mơdrô sĭ gơnam tam dưi đing nao biă. Amăng tơlơi klin ruă Covid-19 ngă, hơdôm pô gơnam OCOP pơplih tañ laih hơdai nao hơdră bơwih ƀong sĭ mơdrô điện tử kah hăng glông blơi prăp Lazada, Shopee, Sendo, Tiki. Yă Lương Thị Mỹ Huệ, Khua Sang bruă bơwih ƀong mơnuih ƀôn sang pơkra jrao Tây Nguyên, pơsit anom hmâo ngă truh kih laih gơnang kơ pơplih jơlan gah hmao tlôn:

“Ƀu dưi ngă tui hơdôm bruă pơtrut sĭ mơdrô, anun anom bơwih ƀong khom ĕp jơlan nao kơ pô. Anom bơwih ƀong hmâo gum hrom laih hơdôm bruă bơwih gah điện tử kah hăng Tiki, Shoppe. Kơnong kơ hmâo hơdôm glông anai kah mơng dưi ngă tui. Bruă sĭ gơnam tui điện tử lĕ ba glăi bôh tŭ yua biă”.

Lăi pơthâo gơnam OCOP mơng tơring glông Đăk Hà ƀơi mông bơkơtuai đah kơmơi pơphun bruă mă tơring čar Kontum

Ơi Nguyễn Quang Hòa, Kơ-iăng Khua Anom pơđĭ kyar plơi pla tơring čar Kontum brơi thâo, amăng tơlơi tơnap tap mơng klin ruă Covid-19, gum hrom hăng hơdôm bôh anom, anom mă bruă hrom, sang anô̆ bơwih ƀong kiăng sĭ gơnam OCOP, anom hmâo ngă klă bruă tô nao rai hăng abih sĭ gơnam, djru sĭ gơnam tam. Gơnang kơ anun ƀu djơ̆ kơnong kơ hrŏ trun truh rơnoh ƀiă hloh bơbeč mơng klin  ruă ôh mơ̆, ñu dô̆ pơtruh pơjing bruă bơwih gah điện tử sĭ mơdrô gơnam tam dong:

“Amăng tơlơi Covid-19, Gơnong bruă đang hmua hmâo pơphô brơi laih kơ Jơnum min mơnuih ƀôn sang pơdŏng grŭp hyu mă bruă črâo ba bruă bơwih ƀong huă hăng tô nao rai gơnam sĭ mơdrô mă mơng đang hmua amăng tơring čar. Kâo ăt lăi pơthâo mơn abih bang gơnam OCOP mơng pô kơ Ding jum đang hmua hăng pơtrut kơtang hơdôm glông sĭ mơdrô gơnam tui điện tử. Hluai tui anun arăng lăi pơhing lĕ ta ăt lăi pơthâo glăi mơn kơ anom mơng pô kiăng sĭ gơnam ƀơi anăp hăng sui thun. Hăng siêu thị lĕ lăi pơthâo abih bang gơnam OCOP mơng pô hmâo laih tơhnal ngă djơ̆”.

Hơdôm bôh anom bơwih ƀong, anom mă bruă hrom, sang anô̆ bơwih ƀong sĭ mơdrô mơng tơring čar Kontum thun phrâo rơgao pơplih klă bruă sĭ mơdrô hăng điện tử hmâo pơjing laih yak pơplih sĭ gơnam amăng hơdôm hrơi klin ruă Covid-19 ngă. Mơnuih ngă đang hmua huăi dô̆ đôm gơnam tam mă mơng đang hmua, hmâo hmăi prăk pơhrui glăi kơ Tết anai ăt pơhlôm pơđao pran jua mơn./.

            Khoa Điềm: Čih – Siu H’ Prăk: Pơblang