VOV4.Jarai - Khul apăn bruă tơring glông Kon Plông, tơring čar Kontum glăk tañ pel ĕp sa kơđi tơlơi phă dlai phrâo ƀuh ƀơi tơring kual Măng Đen. Tơlơi pơhing blung a dưi thâo kơđi tơlơi dưi hmâo Jơnum min mơnuih ƀôn sang tơring kual Măng Đen thâo lom lơ 3/3/2022 ƀơi glông 2 hăng 3, črăn 11, kual 486, kual dlai anai gah Jơnum min mơnuih ƀôn sang tơring kual Măng Đen wai lăng.

Truh kơ 8/3/2022 hơdôm khul apăn bruă mơng tơring glông Kon Plông hmâo pơphun pel ĕp anih anom pơsit hmâo 26 pŏng kyâu hmâo arăng oă, djuai kyâu: phun tang kyâu, Máu chó, phun bôh bơr kơñĭ, phun tang ta gah djuai V hăng djuai VI. Păng prong kyâu mơng 30cm truh kơ 80cm. Rim ƀĕ kyâu ƀing dop kyâu oă gel tơl phun giăm akha kyâu, črăn kyâu dô̆ glăi glom glăi ƀơi anih oă kyâu. Gru nam oă kyâu tui tơlơi pơsit blung a anăp nao gah tơring glông Kon Braih. Ră anai tơlơi phă dlai glăk dưi hmâo Ƀirô tơhan polih pel ĕp Kông ang tơring glông Kon Plông hăng Anom wai lăng dlai kyâu Kon Plông, tơring čar Kontum tañ pel ĕp ngă rơđah./.

Siu H’ Prăk: Pơblang