VOV4.Jarai - Kual Dăp Kơdư glăk prăp lui kơ bơyan hơjan, bơyan kơmok kơ phun pla. Ră anai, hrom hăng nua kơmok glăk đĭ lu, ƀơi tơring čar Kontum mơnuih pla kơ phê ƀơi tơring glông Đăk Hà dô̆ ƀuh hơdôm ƀao kơmok pruai yôm sinh học An Thái NPK ƀu djop mrô pơkă.

Hlâo kơ Tết tui phiăn juăt Nhâm Dần 2022, ayong Nguyễn Văn Trung, ƀơi Ƀut mơnuih ƀôn sang 2B, tơring kual Đăk Hà, tơring glông Đăk Hà, tơring čar Kontum lĕ mơnuih mă bruă ƀơi Sang bruă bơwih ƀong mơnuih ƀôn sang sa ding kơna Kơ Phê 731, gah Phun akha Sang bruă Kơ Phê Việt Nam čơkă mă mơng Sang bruă 20 ƀao kơmok pruai yôm sinh học An Thái NPK, mrô pơkă rim ƀao 50 kg pioh pruai kơ phun kơ phê. Lom glăm ƀao kơmok, mưn ƀuh djôl hloh kơ rơnoh pơkă ñu ba nao pơkă lăng lĕ thâo hĭ abih bang hơdôm ƀao kơmok leng kơ kơƀah sôh bơhmu hăng mrô pơkă amăng ƀao kơmok:

“Kâo čơkă mă mrô kơmok anai mơng Sang bruă bơwih ƀong mơnuih ƀôn sang sa ding kơna Kơ Phê 731. Kâo ba glăi năng ai ñu lơ 26, 27 Tết. Kâo ngă đang hmua kâo glăm ƀao kơmok mưn ƀuh djôl ƀơƀiă anun kâo pơmin năng ai ñu ƀu djop kg ôh anai, anun kâo nao pơkă lông lăng đô̆č. Ƀuh kơƀah lĕ kâo lăi pơthâo kơ khua grŭp”.

Ayong Nguyễn Văn Trung, pô thâo krăn hơdôm ƀao kơmok ƀu djop mrô pơkă

Mơng hrơi thâo ƀao kơmok kơƀah kg mơng ayong Nguyễn Văn Trung, lu mơnuih mă bruă pơkon ăt hmâo mă kơmok mơng Sang bruă bơwih ƀong mơnuih ƀôn sang sa ding kơna Kơ Phê 731 hmâo pơkă lăng pel ĕp glăi lĕ leng kơ tui anun sôh, kơƀah mơng 1 truh 1,5 kg rim ƀao kơmok. Ayong Bùi Đình Kiên, dô̆ ƀơi Ƀut mơnuih ƀôn sang mrô 2A, tơring kual Đăk Hà, tơring glông Đăk Hà, brơi thâo:

“Sang anô̆ kâo čơkă mă lĕ 10 ƀao 5 tạ, rơkơi adơi kâo lĕ truh kơ 1 tơn. Pơkă glăi ha amăng plĕ ƀuh mrô mơng ñu kơƀah năng ai ñu mơng 1 truh 1,5 kg. Mơnuih ƀôn sang, mơnuih mă bruă ƀuh amăng pran jua ƀu đăo gơnang kơ Sang bruă dong tah. Ƀing gơmơi ngă rai asar kơ phê tơnap tap, glêh glar biă. 2 kg kơ phê akă djop pioh blơi sa kg kơmok ôh mơ̆ lom anun kơmok ră anai glăk lăi nao kơ mrô ñu, bơ̆ ƀing gơmơi akă khin lăi truh ôh kơ anô̆ klă hiam ñu”.

Sa ƀao kơmok yôm sinh học An Thái NKP ƀu djop mrô pơkă

Tŭ mă tơlơi lăi glăi kơ tơlơi hơdôm ƀao kơmok yôm sinh học An Thái NPK sĭ kơ mơnuih mă bruă ƀơi hơdôm grŭp ngă kơ phê ƀu djop mrô pơkă, Khua Sang bruă bơwih ƀong mơnuih ƀôn sang sa ding kơna Kơ Phê 731 hmâo pel ĕp, pơsit rim ƀao kơmok leng kơ kơƀah 1,2kg bơhmu hăng mrô čih ƀơi kơđuh ƀao hăng hră pơkôl. Ơi Nguyễn Hữu Tư, Kơ-iăng Khua Sang bruă brơi thâo, mrô kơmok anai Sang bruă hmâo blơi mut 2.256 ƀao mơng sang bruă sĭ kơmok lĕ Sang bruă bơwih ƀong mơnuih ƀôn sang sa ding kơna mă yua hơdră phrâo SVD hmâo anom mă bruă ƀơi plơi prong Kontum pioh sĭ kơ mơnuih mă bruă. Lom mă bruă hăng Sang bruă bơwih ƀong mơnuih ƀôn sang sa ding kơna Kơ Phê 731, khua pơ ala kơ sang bruă sĭ kơmok lĕ ơi Lê Quang Dũng, Khua Sang bruă ngă rah khua git gai hmâo lăi mơn hmâo tơlơi ƀu djop mrô pơkă mơng rim ƀao kơmok hăng lăi lĕ yua soh mơng măi pơkra anung kơmok. Gah jơlan gah pơsir mrô kơmok ƀu djop mrô pơkă, ơi Nguyễn Hữu Tư pơsit, anom sĭ kơmok hmâo gơgrong ba laih tơlơi anai:

“Ayong Dũng sa lĕ ñu amra gơgrong ba mrô ƀu djop anun kơ mơnuih mă bruă. Dua lĕ ñu lăi pơdah tơlơi păp ñai abih bang mơnuih apăn bruă, mơnuih mă bruă ƀơi sang bruă kơ pkê”.

Hơduah ĕp lăng ƀuh lĕ hmâo laih ƀiă biă mă ñu 3 thun Sang bruă bơwih ƀong mơnuih ƀôn sang sa ding kơna Kơ Phê 731 gah Sang bruă Kơ Phê Việt Nam ƀơi tơring glông Đăk Hà, tơring čar Kontum ngă hră pơkôl blơi kơmok yôm sinh học SVD sĭ kơ mơnuih ngă đang kơ phê pioh pruai kơ phun kơ phê. Tơlơi čih ƀơi kơđuh ƀao kơmok yôm sinh học An Thái NPK ƀu djop djơ̆ tui mrô pơkă brơi ƀuh, kơmok pruai dưi mă yua kơ hơdôm djuai phun pla hăng dưi pơkra rai mơng Sang bruă bơwih ƀong mơnuih ƀôn sang tui hơdră hữu cơ sinh học An Thái, ƀơi Lô C4B, Kual sang măi Hoà Bình, plơi prong Kontum, tơring čar Kontum./.

            Khoa Điềm: Pô čih – Siu H’ Prăk: Pơblang