VOV4.Jarai-Tlam lơ 4/7, Khua dêh čar ơi Phạm Minh Chính hrom hăng ding kơna amăng kơnuk kơna dêh čar, laih anun djop tơring čar ƀôn prong jơnum pơčrông sai kơ bruă čuk pơkra jơlan dêh čar. Git gai jơnum, ơi Phạm Minh Chính, Khua dêh čar lăi lĕ, bruă pok pơhai čuk pơkra jơlan phun amăng dêh čar jing sa bruă mă yôm phara mơ̆ tui hăng Hră pơtrun jơnum ruah khua Ping gah tal XIII dêh čar hơmâo lăi rơđah laih.

Khua dêh čar pơtrun hiăp djop ding jum, anom bruă hăng djop tơring čar ƀôn prong sem glăi, ngă klă bruă prăp hlâo tuh pơ alin. Pơtrut bruă čuk pơdăo pơklaih ala lŏn, duh glăi dram gơnam mơnuih ƀôn sang djơ̆ čuk jơlan ƀơi tơring čar. Mă yua prăk duh kơ mơnuih ƀôn sang djop hăng tŭ yua. Ding jum man pơdong, ding jum kông ngăn hăng ayuh hyiăng yap glăi, tơdah gun ƀơi pơsir mơtam kiăng kơ djop anih kuai mă lŏn, pơtâo čuah dưi djop man pơkra jơlan.

Khua dêh čar rơkâo akŏ pơjing khul git gai mơ̆ng dêh čar kơ bruă čuk pơkra jơlan, akŏ pơjing khul mơnuih mă bruă, amăng anun Khua jơnum min mơnuih ƀôn sang tơring čar ngă khua grup pioh pơtrut pok pơhai bruă ngă anai amăng tơring čar hăng pơsir hơdôm tơlơi tơnap tap lơ̆m pok pơhai hơdôm kơčăo bruă čuk pơkra jơlan.

Nay Jek: Pơblang