VOV4.Jarai-Tlam lơ 24/3, ƀơi sang bruă khua mir sir, Anom bruă khua mir sir hăng Anom bruă khua wai lăng djop djuai ania mơnuih mơnam Việt Nam ngă hrom pơphun jơnum pơƀut bruă mă ngă hrom kơplah wah anom bruă khua mir sir hăng anom bruă khua wai lăng djop djuai ania mơnuih mơnam Việt Nam thun 2021, bruă phun yôm ngă hrom amăng thun 2022. Khua mir sir ơi Nguyễn Xuân Phúc hăng ơi Đỗ Văn Chiến, ding kơna khul git gai ping gah dêh čar, Khua anom bruă wai lăng djop djuai ania mơnuih mơnam Việt Nam git gai hrom mông jơnum.

Khua mir sir ơi Nguyễn Xuân Phúc mă rup hơdor pioh hăng ƀing khua mua nao jơnum

Pơhiăp ƀơi mông jơnum, Khua mir sir ơi Nguyễn Xuân Phúc rơkâo Jơnum min wai lăng djop djuai ania mơnuih mơnam Việt Nam git gai, pơčrâo ba, pơtô pơblang, jak iâu djop gưl mơnuih ƀôn sang, đăo kơnang kjăp, tŭ ư sa tơlơi pơmin hăng bruă mă ngă tui tŭ yua man pơdong hăng pơgang Lŏn ia ta amăng rơnuk phrâo. Ƀrô djơ̆ tal anai, Khua mir sir rơkâo kơnuk kơna, khua git gai pơ ala mơnuih ƀôn sang dêh čar, gong gai kơnuk kơna djop gưl đing nao hloh dơ̆ng hơdră pơsir tơlơi rơkâo mơ̆ng Jơnum min djop djuai ania mơnuih mơnam Việt Nam hăng jơnum min wai lăng djop djuai ania mơnuih mơnam Việt Nam djop gưl.

Nay Jek: Pơblang