VOV4.Jarai - Tơdơi kơ lu hrơi hơduah lăng, hơduah ĕp kơ kual krah lŏn pơpư̆ ƀơi tơring glông Kon Plông, tơring čar Kontum, rơwang hrơi tơjuh rơgao, ƀơi tơring kual Măng Đen, tơring glông Kon Plong, Grŭp hyu mă bruă mơng Grŭp črâo ba pơgang pơgăn ayuh hyiăng ƀu klă ngă dêh čar ta hmâo mông mă bruă hăng Grŭp črâo ba bruă pơgang pơgăn ayuh hyiăng ƀu klă ngă hăng hyu ĕp mơnuih hmâo tơlơi truh tơring čar Kontum. Kơtưn gum hrom, gơgrong hlâo bŏng glăi hăng lŏn pơpư̆ kiăng pơhlôm klă tơlơi hơdip, kông ngăn mơnuih ƀôn sang hăng ring bruă man pơdŏng lĕ hơdôm tơlơi yôm phăn đing nao hlâo.

Tơlơi lăi pơthâo glăi mơng tơring glông Kon Plông, mơng Grŭp črâo ba bruă pơgang pơgăn ayuh hyiăng ƀu klă ngă hăng hơduah ĕp mơnuih hmâo tơlơi truh tơring čar Kontum hăng Grŭp hyu mă bruă brơi ƀuh, khă akă hmâo tơlơi răm rai gah ană mơnuih ăt kah hăng kông ngăn, samơ̆ hơdôm tơlơi lŏn pơpư̆, tơtar hơdôm hrơi rơgao hmâo ngă laih mơnuih ƀôn sang bơngot. Bruă lăi pơhing ngă hơđong pran jua mơnuih ƀôn sang, pơtô brơi pơgang bĕ răm rai lom hmâo lŏn pơpư̆ ngă dưi hmâo gong gai tơring glông Kon Plông pok pơhai yak blung a, samơ̆ bôh tơhnal akă djơ̆ hăng tơlơi čang rơmang ôh. Ƀơi anăp bôh nik lŏn pơpư̆ anai, hơdôm bôh ƀirô mơng tơring čar ƀu hmâo bruă mă juăt gah tơlơi anai, ơi Văn Tất Cường, Kơ-iăng Khua Gơnong bruă đang hmua hăng pơđĭ kyar ƀôn lan tơring čar Kontum, Ding kơna Grŭp git gai bruă pơgang pơgăn ayuh hyiăng ƀu klă ngă hăng hyu ĕp mơnuih hmâo tơlơi truh tơring čar, rơkâo đĭ:

 “Kâo rơkâo hơdôm Ding jum, Gơnong bruă hmâo bơdjơ̆ nao pơtrut mơtăm bruă kơsem min, pơsit tơlơi lŏn pơpư̆ hơdôm hrơi rơgao ƀơi tơring čar Kontum, biă ñu mơng tơring glông Kon Plông. Tañ ba tơbiă hơdôm tơlơi ba truh mơng anun lĕ lăi pơthâo, lăi pơtă hlâo kơ gong gai plơi pla kiăng hmao pơdŏng hơdôm jơlan gah bŏng glăi hơdôm anô̆ pioh glăi mơng ayuh hyiăng ƀu klă ngă amra hmâo ƀơi anai”.

Hluai tui tŭ mă tơlơi gum pơhiăp mơng gong gai tơring glông Kon Plông, tơring čar Kontum hăng khua pơ ala kơ Ding jum, Gơnong bruă ăt kah hăng ƀing juăt bruă, grŭp hyu mă bruă mơng Grŭp črâo ba pơgang pơgăn ayuh hyiăng ƀu klă ngă lăi lĕ, ƀơi anăp khom đing nao amăng bruă pel ĕp hơdôm anô̆ bơdjơ̆ nao hăng bơbeč truh bôh nik mơng hơdôm tal lŏn pơpư̆, tơtar truh ƀơi anai. Khom pơtrut kơtang bruă lăi pơhing, pơsur djru mơnuih ƀôn sang, gong gai să ƀuh anô̆ ƀu klă, rơnoh bơdjơ̆ nao ăt kah hăng anô̆ bơbeč truh mơng lŏn pơpư̆, tơtar kiăng gơgrong hlâo pơgang bĕ pơhlôm hlâo. Bĕ lui raih, samơ̆ mơta pơkon ăt bĕ mơn tơlơi hual kơdual, bơngot huĭ kơ anô̆ bơdjơ̆ nao tơlơi hơdip mơda, pơđĭ kyar bơwih ƀong mơnuih mơnam hăng rơnuk rơnua hơđong mơng plơi pla. Ơi Nguyễn Đức Quang, Khua Anom bŏng glăi hăng hơkrŭ pơsir anô̆ răm rai yua ayuh hyiăng ƀu klă ngă, Kơ-iăng Khua Anom bruă Grŭp črâo ba, Khua grŭp hyu mă bruă lăi rơđah:

“Pel ĕp glăi bruă bŏng glăi, lăi pơthâo hơdôm bôh yôm bơdjơ̆ nao truh tơlơi bŏng glăi hăng lŏn pơpư̆, hluai tui hơdôm hră pơ-ar pơtô ba mơng Grŭp črâo ba pơgang pơgăn ayuh hyiăng ƀu klă ngă hăng hơdôm hră pơ-ar pơtô ba mơng Anom kơsem min Vật lý địa cầu, laih anun mơng Ding jum man pơdŏng prăp lui kiăng kơ gong gai, mơnuih ƀôn sang thâo kiăng hmâo gơgrong hlâo pơgang bĕ ngă plai ƀiă răm rai. Črâo ba hơdôm ƀirô juăt bruă gum hrom hăng ƀirô kơsem min tañ ĕp ƀuh bôh than ba truh. Mơng tơlơi găn rơgao gah Sông Tranh ƀing ta amra ngă ƀiă hrơi kơsem min, pơsit kiăng tañ ba tơbiă tơlơi pơsit sik nik, kiăng hmâo bruă pơsir djơ̆, tañ, ba glăi bôh tŭ yua hăng pơkrem hrơi blan”.

Hrom hăng kơtưn gum hrom, gơgrong hlâo bŏng glăi hăng lŏn pơpư̆ kiăng pơhlôm klă tơlơi hơdip mơda, kông ngăn mơng mơnuih ƀôn sang ăt kah hăng hơdôm ring bruă man pơdŏng ƀơi tơring glông Kon Plông, tơring čar Kontum, gah sui thun Grŭp hyu mă bruă mơng Grŭp črâo ba pơgang pơgăn ayuh hyiăng ƀu klă ngă dêh čar ta rơkâo Grŭp git gai Anom bruă pơgang, pơgăn ayuh hyiăng ƀu klă ngă hăng hyu hơduah ĕp mơnuih hmâo tơlơi truh tơring čar Kontum jao kơ hơdôm ƀirô juăt bruă mơng tơring čar gum hrom hăng Anom kơsem min Vật lý địa cầu, hơdôm ƀirô kơsem min tañ pok pơhai kơsem min kơ tơlơi lŏn pơpư̆, tơtar. Anom hmâo lăi pơthâo glăi pel ĕp hăng pơsit abih bang kiăng grŭp črâo ba pơphô brơi Kơnuk kơna hmâo hơdôm bruă pơsir phun, sui thun. Hơdôm bôh sang măi drai ia pơkĕ apui, kah hăng: Gah hlâo Kontum, Đăk Ring ăt kah hăng ring bruă dơnao ia bơnư̆ pơkon khom dưi pel ĕp, lăng glăi hơdôm bruă mă kiăng pơhlôm klă kơ kual tơkai ia tui jơlan gah đing nao yôm phăn hăng bruă pơgang pơgăn lon pơpư̆./.

Khoa Điềm: Čih – Siu H’ Prăk: Pơblang