VOV4.Jarai - Akŏ bruă “Kơtưn klă dong sĭ mơdrô pơ tač rơngiao mơng anom bơwih ƀong sĭ mơdrô gah ƀrô hăng anet mơng gơnong bruă pơkra ngok hra, añăm tam, boh troh Việt Nam” amra pơgôp ngă klă tui hơnong pơkă ba sĭ mơdrô pơ tač rơngiao kyâo pơtâo, akan hơdang truh rơbêh 50 klai đôlar Mi amăng thun 2025 hăng ba dêh čar ta jing dêh čar sĭ mơdrô klă hloh amăng kual ASEAN hăng amăng rŏng lŏn tơnah. Anai lĕ tơlơi pơhing hơmâo lăi pơthâo amăng Jơnum pơphun akŏ bruă “Kơtưn klă dong amăng sĭ mơdrô pơ tač rơngiao mơng anom bơwih ƀong sĭ mơdrô gah ƀrô hăng anet mơng gơnong bruă pơkra ngok hra, añăm tam, boh troh Việt Nam” hơmâo Khul pơlir hơbit sĭ mơdrô hăng tuh tia pơkra pơjing Việt Nam (VCCI) gum hrŏm hăng Oxfam pơphun mơguah lơ 6/5, ƀơi Hà Nội. Amăng jơnum bơkơtuai ƀing khua mua brơi thâo, bruă ba hyu sĭ mơdrô boh troh lĕ sa jơlan yak nao klă mơng anom bơwih ƀong sĭ mơdrô hăng ba glăi pơhrui lu hloh, samơ̆ aka ƀu tŭ mă hơdôm tơlơi dưi. Yua anun, gơnam ba sĭ pơ kual EU dŏ aset. Akŏ bruă anai anăp nao klă dong amăng bruă sĭ mơdrô gơnam pơ Khul pơlir hơbit kual Mi kô̆ (EU) mơng anom bơwih ƀong sĭ mơdrô anet hăng gah ƀrô mơng gơnong bruă pơkra ngok hra, añăm tam, boh troh; djru hơmâo lu dong anih ba sĭ mơdrô hăng lu dêh čar blơi mut mơng kual EU kiăng pơtrut klă dong amăng sĭ mơdrô pơ tač rơngiao; hrưn đĭ klă dong mơng gơnong bruă hăng tơlơi hing ang mơng gơnam đang hmua Việt Nam.

Siu Đoan: Pơblang