VOV4.Jarai-Lơ 4/5, Ding jum Pơtô hăng Pơjuăt mơ-it hră kông điện kơ Khua Gơnong bruă Pơtô hăng Pơjuăt kơ bruă kơtưn pơhlôm, pơgang čơđai muai, čơđai sang hră ƀlung ia. Hră kông điện mơ̆ng Ding jum Pơtô hăng Pơjuăt rơkâo djop Gơnong bruă Pơtô hăng Pơjuăt git gai brơi kơtưn brơi pơtô lăi, pok pơhai tŭ yua hră pơar pơčrâo trun mơ̆ng khua dêh čar, Khua ding jum Pơtô hăng Pơjuăt kơ bruă pơhlôm, pơgang tơlơi ruă nuă rơka rơkač, ruă nuă, ƀlung ia kơ čơđai muai, čơđai sang hră.

Djop gơnong bruă Pơtô hăng Pơjuăt khom pok pơhai bruă pơtô lăi, pôr pơthâo kiăng pơđĭ tui tơlơi thâo hluh, pơtô kơ čơđai sang hră ngă tui djơ̆ hơdră pơtô pơhlôm, pơgang ƀlung ia, boh nik ñu thâo krăn ia dơnao, ia hnoh anih hŭi rơhyưt; pok pơhai, pơtô brơi tơlơi thâo, hrăm luai ia, pơgang hŭi ƀlung ia amăng djop sang hră kiăng pơđai thâo pơgang mă pô amăng bơyan pơdơi prong.

Git gai brơi kơtưn amăng bruă ngă hrom sang anŏ, khul grup mơnuih mơnam hăng gong gai kơnuk kơna pioh wai lăng, krăo lăng abih bang čơđai hăng cơđai sang hră amăng hrơi pơdơi hrăm hră, pơgang rơnuk rơnua, pơhlôm hŭi hơmâo tơlơi truh blung ia.

Nay Jek: Pơblang