Hlâo kơ hrơi nao pơ ƀôn prong Hồ Chí Minh pơhmư̆ mông Jơnum hlăk ai rơgơi mơbruă ngă tui tơlơi Wa Hồ pơtô đơ đam dêh čar tal 8, thun 2025, Kpuih Hmin ăt prôk tơgŭ, na pơ đang kơsu či pơtô bruă reh, kuah kơtăk kơsu kơ ƀing phrâo mă bruă. Pran jua hur har mơ̆ng sa čô khua grup hlăk ai pơhưč pran jua hăng ƀing hlăk ai. Kông ñơn hlăk ai Siu Pôp brơi thâo: “Kpuih Hmin lĕ mơnuih kông ñơn rơgơi, pơtô brơi gơmơi reh kuah kơtăk kơsu tŭ yua biă. Ƀing gơmơi hrăm tui hăng ngă tui lăp djơ̆. Pơhmutu Kpuih Hmin pơtô kuah kơđuh kơsu kiăng ƀlĕ lu kơtăk ta khŏm kơđiăng ta reh ƀu đil, ƀu dlăm đơi lơi, reh găp ƀrô đôč; glông reh mag anet samơ̆ kơtak ƀlĕ lu biă. Rơngiao kơ anun, Hmin ăt pơčeh pơkra mă gai glông brơi ƀing kông ñơn mă yua pruih ia jrao hăng pik keo pơgang hlăt kman mot ƀong phun kơsu hăng glông, hơgŏm mơ̆ hlâo adih ƀu thâo ngă ôh. Hmin jing hlăk ai rơgơi bruă ngă hmua hăng hur har pran jua pơtô brơi abih bang ngă bruă.

Tơlơi rơgơi, thâo pơčeh phrâo amăng bruă mă ăt kah hăng bruă hlăk ai, hơdôm tơlơi gum pơgôp mơ̆ng Kpuih Hmin amăng hơdôm thun rơgao hơmâo djŏp gưl tŭ yap. Hmư̆ hing hloh lĕ hră pơpŭ “Hlăk ai rơgơi ngă tui tơlơi Wa pơtô” gưl tơring čar rơwang thun 2023-2025; Tơhan bơkơtưn ngă bruă ƀơi anih mă bruă lu thun mơtăm. Ñu hơmâo Khul hlăk ai dêh čar ta brơi Hră bơni thun 2022, hơmâo mă Anăn pơpŭ “Tơngan mah” tơlơi pơplông reh kuah kơtăk kơsu thun 2024...Biă ñu thun anai, Kpuih Hmin pơư pơ-ang hơmâo ruah jing mơnuih pơ ala nao pơhmư̆ mông Jơnum hlăk ai rơgơi mơbruă hla tui tơlơi Wa Hồ pơtô đơ đam dêh čar tal 8. Kpuih Hmin ră ruai: “Mơ̆ng hrơi nao ngă kông ñơn, mut amăng Khul hlăk ai mut phung rơnuk Hồ Chí Minh hăng ngă khua hlăk ai mơ̆ng Kual ngă hmua anai. Kâo hơmâo pơƀut lu hlăk ai gir ngă bruă, juh alum kiăng abih bang gir ngă bruă. Gir hrăm tui tơlơi Wa Hồ pơtô, kâo gir ngă tui tơlơi pơtô mơ̆ng Kông ti amăng bruă reh kơtăk kơsu, pơplông kông ñơn rơgơi hơmâo mă pri yôm mơn, hơmâo Hră bơni, pô kâo hai mơak hăng pơ-ư pơ-ang biă mă. Jing hlăk ai kâo amra gir ngă bruă klă hloh, hrŏm hăng hlăk ai amăng grup, ƀu pơdơi pơdă hrăm hră, gir mă bruă pơčeh phrâo kiăng dưi ngă lu bruă prong hloh”.

Ơi Trần Quang Huân - Khua grup pơkra kơsu Hoà Bình, Kông ti TNHH sa ding kơna Kơsu Čư̆ Prong brơi thâo, Kpuih Hmin ƀu kơnong jing sa čô kông ñơn rơgơi đôč ôh mơ̆ ăt gir ngă bruă amăng khul dong. Hăng bruă jao ngă Khua grup hlăk ai, ñu hơmâo lu bruă ngă sit nik djru hlăk ai apăn bruă, kơsu hơmâo lu, yua anun hơmâo prăk blan hơđong. Rơngiao kơ mă bruă reh kơtăk kơsu ƀong prăk kiăo tui mrô đang kơsu mơ̆ng  Kông ti, Kpuih Hmin thâo đĭ kyar bơwih ƀong amăng sang anŏ dong. Ñu pơkom prăk blơi lŏn, laih anun pla giăm 1ha đang kơphê. Ơi Trần Quang Huấn brơi thâo: “Kpuih Hmin jing khua grup hlăk ai rơgơi biă mă. Ñu lĕ mơnuih djuai ania ƀiă, sang anŏ tơnap tap, samơ̆ yua triang kơtang, ñu hrăm tui hăng mă bruă rơguăt biă. Amăng bruă mă ñu lêng kơ nao hlâo, hơmâo mă lu pri, mơ̆ng pri yua kual ngă hmua, kông ti truh kơ pri yua Grup bơwih ƀong pơphun”.

Hăng tơlơi gir run ƀu pơdơi pơdă, Kpuih Hmin jing mơnuih ngă gru amăng kual mơnuih ƀôn sang djuai ƀiă ƀơi Ia Vêr, tơring glông Čư̆ Prong (Gia Lai). Čang rơmang, mơ̆ng tơlơi ră ruai mơ̆ng Kpuih Hmin, amra hơmâo thim lu hlăk ai, biă ñu hlăk ai djuai ania ƀiă, hrưn đĭ amăng bruă hrăm hră, mă bruă, gum djru đĭ kyar plơi pla, lŏn ia./.