Hơdôm blan rơgao, lu anih amăng ƀôn prong Đà Nẵng jă apui kơđen. Ƀơi phường Hòa Hải, kuận Ngũ Hành Sơn, hơdôm hơpluh čô mơnuih hơmâo kông ñơn, ƀô̆ đô̆i, ƀing apăn bruă, ƀing tha rơma rơgao 70 thun laih ăt nao pơčruih braih điô̆, rơtă kiăng kơ klon ƀañ tek, ƀan čưng mơ-it nao neh met wa kual hơjan ia ling dăo gah kơdư. Rĭm boh ƀañ tek jing pran khăp pap mơ-it nao neh met wa kual kơdư.

Mơguah sing bring, yă Trần Thị Thương, sang anŏ sĭ mlia ƀơi sang čơ Hòa Cường lui hĭ nao sĭ gơnam, ñu nao blơi 50 kĭ braih điô̆ hăng rơtă kiăng hrŏm hăng abih bang mơnuih tuk ƀañ tek. Yă Thương brơi thâo:

“Lơm hmư̆ tơlơi pôr pơhing amăng brô̆, kâo ol kơdol biă mă samơ̆ ăt ƀu dưi djru brơi lu kar hăng mơnuih pơkŏn, yua anun rai gum tơngan hrŏm klon ƀañ tek đôč. Ha tlŏ lơm rơpa kar hăng ha anung lơm trơi. Mơng mlăm tom brơi ăt pơmĭn na nao mơn, anun mơguah anai kâo đuăi rai pơ anai kiăng tuk ƀañ tek tañ mơ-it nao amăng hrơi anai mơtăm. Kâo ăt ruă amăng pran jua mơn lơm ƀuh neh met wa bưp tơlơi truh sat tui anun”.

Hơdôm hrơi anai, sang anŏ ơi Nguyễn Thành Long, ding kơna amăng grup mơgăt rơdêh hơmâo kơthung pơgiăng gah tlôn ƀôn prong Đà Nẵng dŏ ƀơi phường Hòa Hải, kuận Ngũ Hành Sơn jing anih kiăng neh met wa nao klon, tuk ƀañ tek mơ-it nao pơ kual kơdư. Amăng tơhrơi kah hăng mlăm, ƀơi lan sang, amăng sang apui lêng kơ dun apui. Ha mlăm neh met wa amăng ƀon lan dŏ krŏng tuk ƀañ tek. Ơi Đặng Tâm, mah rơbêh 70 thun laih dŏ ƀơi kuận Ngũ Hành Sơn ăt dŏ krŏng ha mlăm kiăng lăng gô̆ ƀan tek tañ tơsă kiăng mơguah sing bring amăng pơgiăng nao pơ kual kơdư.

“Kâo ăt tha rơma laih samơ̆ gir run djru klon ƀañ tek hrŏm hăng adơi ayong anong wa kiăng mơ-it nao neh met wa kual hơjan kơthel gah kơdư. Ƀing gơmơi gum hrŏm mơng mơmŏt truh ră anai, truh 11, 12 mông kah glăi, hrơi anai ƀing gơmơi klon dong”.

Sang pioh sĭ kơphê mơng sang anŏ ơi Nguyễn Thành Long ăt jing anih kiăng neh met wa nao pơčruih gơnam tam mơ-it nao kual kơdư. Ơi Nguyễn Thành Long brơi thâo, hơdôm thun rơgao, rĭm wŏt Đà Nẵng ƀudah mơnuih ƀôn sang kual Tong krah bưp hơjan kơthel lêng kơ hơmâo tơlơi gum djru mơng đơ đam dêh čar. Ră anai hơdôm boh tơring čar kual kơdư bưp tơnap tap, neh met wa rai pơčruih gơnam gum djru. Ƀing ta ha kơtăk drah, hlơi hlơi lêng kơ ol kơdol pran jua hăng čang rơmang amra djru brơi ƀơƀiă kơ neh met wa kual kơdư:

“Tom brơi hơmâo klon 1.000 boh ƀañ tek, hrơi anai hơmâo klon dong 1.000 boh, kiăng kơ mơ-it nao kual kơdư djru brơi neh met wa. Adơi ayong mut hrŏm amăng lu grup gum tơngan hrŏm. Neh met wa ăt pơčruih prăk kak kiăng kơ blơi mơnong, rơtă, amăng hrơi pơgi ƀing gơmơi amra pơgiăng nao pơ tơring čar Yên Bái. Pơphun bruă anai ƀing gơmơi jak iâu ha boh ƀon lan, ƀut plơi pla hăng adơi amai amăng phường Hòa hải, kuận Ngũ Hành Sơn. Ƀing gơmơi aka ƀu pơdơi ôh ăt tŏ tui klon ƀañ tek hăng tuh amăng mơmŏt mlăm. Bruă pơčruih hlơi hơmâo hơget djru brơi gơnam anun, pơhmutu hơmâo ia, mitôm, gơnam yua, ƀing gơmơi amra čih glăi tong ten hăng pơgiăng nao hơdôm boh tơring čar kual kơdư. Ƀing gơmơi ăt klon ƀañ tek truh mơguah hrơi pơgi”.

Hơdôm hrơi anai, sa, dua boh sang pơkra ƀañ amăng ƀôn prong Đà Nẵng đing nao bruă pơkra ƀañ kiăng djru brơi neh met wa kual kơdư. Gong gai ƀon lan hơdôm boh tơring čar, ƀôn prong kual Tong krah hơmâo jak iâu mơnuih ƀôn sang pơčruih prăk djru brơi neh met wa kual kơdư rŭ glăi anŏ răm rai yua kơthel. Hơdôm grup gum djru hơmâo gum hrŏm amăng bruă djru mơnuih hăng rơmet pơagaih tơdơi kơ abih kơthel. Hơdôm boh rơdêh mơng kual Tong krah tŏ tui tlôn đuăi nao kual kơdư djă ba mơnong ƀong huă, gơnam yua, ia mơñum hăng bă blai pran khăp pap mơng mơnuih ƀôn sang kual Tong krah anăp nao neh met wa kual hơjan ia ling dăo gah kơdư, djru brơi neh met wa tañ hơđong tơlơi hơdip mơda./.