VOV4.Jarai - Kual Dap Kơdư glăk hơmâo tơlơi pơplih prong biă mă, hăng 4/5 boh tơring čar amra hơmâo hơdôm glông jơlan brơi rơdêh đuăi hmar amăng hrơi blan pơ anăp. Ră anai, gong gai tơring čar glăk ngă hrŏm hăng hơdôm ding jum, anom bruă bơdjơ̆ nao pơtrut ngă tañ bruă anai. Anom bơwih ƀong hăng mơnuih ƀon sang amăng kual čang rơmang biă mă kơ tơlơi pơplih phrâo prong mơng hơdôm glông jơlan rơdêh đuăi hmar anai.

Ƀơi anăp tơlơi kiăng ječ mơng Kơčăo bruă pơkra jơlan rơdêh đuăi hmar Khánh Hòa - Buôn Ma Thuột hăng bruă pơđĭ kyar bơwih ƀong huă - mơnuih mơnam, blan 7 phrâo rơgao, khua mua apăn bruă Jơnum min pơ ala mơnuih ƀon sang tơring čar Khánh Hòa hơmâo iâu jơnum, laih anun hluai tui Tơlơi pơtrun kơ bruă kĭ pơkôl brơi nao prăk tuh pơ plai rơwang thun 2021-2025, mơng mrô prăk tơring čar him lăng hơmâo giăm 350 klai prăk pioh ngă kơčăo bruă anai. Ơi Trần Mạnh Dũng, Kơ-iăng khua Jơnum min mơnuih ƀon sang tơring čar Khánh Hòa brơi thâo:“Anai jing bruă yôm phun, pơtrut pơđĭ kyar bơwih ƀong huă - mơnuih mơnam mơng 2 boh tơring čar Dak Lăk hăng Khánh Hòa. Biă ñu, čơkă hlâo tơlơi đĭ kyar mơng kual bơwih ƀong Vân Phong, tơdrun tum păn Vân Phong bơwih brơi bruă ba hyu sĭ gơnam mơng hmua mơng Dak Lăk. Kơnuk kơna hăng Khua mua pơ ala mơnuih ƀon sang dêh čar ăt hơmâo lăng ba, tơring čar pơhlôm prăk tuh pơ plai hrŏm hăng Kơnuk kơna. Tơlơi gơgrong bruă mơng Jơnum min khua pơ ala mơnuih ƀon sang tơring čar hrŏm hăng Jơnum min mơnuih ƀon sang khŏm lăng ba, lô brơi”.

Kơčăo bruă pơkra jơlan rơdêh đuăi hmar Khánh Hòa - Buôn Ma Thuột jing sa amăng hơdôm kơčăo bruă yôm phun mơng lŏn ia ta hơmâo Kơnuk kơna rơkâo hăng Khua pơ ala mơnuih ƀon sang dêh čar tuh pơ plai prăk mơng kơnuk kơna. Jơlan anai glông năng ai 117 km, hơmâo 4 glông jơlan rơdêh nao rai laih anun amra pơphun pơkra amăng thun 2023, ngă giong amăng thun 2025. Kơčăo bruă jơlan găn nao tơring čar Khánh Hòa amra djru brơi tơring čar tañ rŭ glăi, pơđĭ kyar tơlơi bơwih ƀong huă - mơnuih mơnam; dưi pơtruh nao rai, ngă hrŏm kơplah wah Khánh Hòa hăng hơdôm boh tơring čar kual Dap Kơdư.

Khua dêh čar ơi Phạm Minh Chính sem lăng jơlan rơdêh đuăi hmrar Khánh Hoà - Buôn Ma Thuột.

Gah kual Dơnung Dap Kơdư, tơring čar Lâm Đồng hơmâo prăp lui djŏp mơta tơlơi laih či pơkra jơlan rơdêh đuăi hmar Tân Phú - Bảo Lộc hăng Bảo Lộc - Liên Khương dong mơng hrơi Khua dêh čar ta kĭ hră brơi tuh pơ plai. Jơlan rơdêh đuăi hmar Dầu Giây - Liên Khương glông năng ai 200km, hơmâo 3 kơčăo bruă kah hăng: Dầu Giây - Tân Phú, Tân Phú - Bảo Lộc hăng Bảo Lộc - Liên Khương. Ơi Trần Văn Hiệp, Khua Jơnum min mơnuih ƀon sang tơring čar Lâm Đồng brơi thâo, tơring čar amra brơi nao 15.300 klai prăk pioh ngă 2 glông jơlan rơdêh đuăi hmar, anun lĕ jơlan Tân Phú - Bảo Lộc hăng Bảo Lộc - Liên Khương.

“Jơlan rơdêh đuăi hmar dưi mă yua tơdah tañ lĕ amăng rơnuč thun 2025, tơdah kaih lĕ amăng blan 6/2026. Kâo pơmin ñu amra ba jơlan tơlơi đĭ kyar mơng Lâm Đồng pơ anăp anai, pơplih ƀô̆ adung mơta mơng tơring čar Lâm Đồng. mơng anai nao pơ ƀon prong HCM rơngiă 8-9 mông, hrơi pơdơi lĕ 10-12 mông amra jing tañ hloh, rơngiă mă mơng 3 truh 3 mông ha mơkrah, kaih đơi lĕ 4 mông đôč. Bruă ba hyu añăm pơtăm, bơnga pơ ƀon prong HCM ăt amuñ mơn, giong anun bruă pơgiăng nao gơnam pioh pơkra anih anom, măi mok, ăt tañ mơn...”

Kar kăi tui anun mơn, lơ 17/8 phrâo rơgao, Jơnum min mơnuih ƀon sang tơring čar Dak Nông hăng Jơnum min mơnuih ƀon sang tơring čar Bình Phước hơmâo mông ngă bruă hăng Grup bơwih ƀong Vingroup hăng Sang bruă prăk sĭ mơdrô pơčruh ngăn Kỹ thương Việt Nam kơ bruă man pơkra jơlan rơdêh đuăi hmar Kơdư - Dơnung gah yŭ črăn găn nao Gia Nghĩa - Chơn Thành, glông năng ai 130km. Ƀơi mông ngă bruă, khua mua hơdôm gơnong bruă, hăng hơdôm anih hơmâo jơlan đuăi nao lêng pơsit anŏ yôm mơng jơlan rơdêh đuăi hmar Dak Nông - Chơn Thành. Tơlơi anai amra djru pơđĭ kyar brơi 2 boh tơring anai, djơ̆ hăng tơlơi kiăng mơng mơnuih ƀon sang. Pơhiăp ƀơi mông ngă bruă, Khua Jơnum min mơnuih ƀon sang tơring čar Dak Nông ơi Hồ Văn Mười pơsit gum hrŏm hăng Bình Phước amăng hrơi blan ngă bruă. Bruă pơkra jơlan rơdêh đuăi hmar anai djru pơđĭ kyar bơwih ƀong - mơnuih mơnam mơng tơring čar Dak Nông lăi hơjăn hăng kual Dap Kơdư lăi hrŏm.

Hră lơkak jơlan rơdêh đuăi hmar Dầu Giây- Tân Phú - Bảo Lộc - Liên Khương - Buôn Ma Thuột.

Bơ kual Pơngŏ Dap Kơdư, phrâo anai Jơnum min mơnuih ƀon sang tơring čar Gia Lai ăt hơmâo hră jao kơ Gơnong bruă wai lăng jơlan ngă hrŏm hăng hơdôm anom bruă pơphun kơsem min kơčăo bruă tuh pơ plai, ngă hră pơ-ar rơkâo man pơkra jơlan rơdêh đuăi hmar Pleiku - Quy Nhơn (tơring čar Bình Định). Tui hăng hră pơdah thâo amăng thun 2020 mơng 3 boh tơring čar Gia Lai, Kon Tum hăng Bình Định mơ-it kơ Kơnuk kơna, him lăng jơlan rơdêh đuăi hmar Pleiku - Quy Nhơn, glông 160km, prăk tuh pơ plai him lăng truh 56.000 klai prăk. Lơ 22/5/2022, pơhiăp ƀơi mông ngă bruă hăng Khua dêh čar ơi Phạm Minh Chính, ơi Hồ Văn Niên - Khua git gai Ping gah tơring čar Gia Lai rơkâo đĭ Kơnuk kơna prăp brơi prăk pioh ngă bruă amăng rơwang thun 2026-2030 ƀudah jao kơ hơdôm anom bruă, ding jum, Ping gah gơnong dlông djru brơi tơring čar Gia Lai ĕp anom bruă ngă hrŏm đah mơng tañ pơkra jơlan hlâo kơ thun 2030.

“Ƀing gơmơi ăt pơhiăp tom laih hăng ƀing khua ƀơi tơring čar Bình Định, 2 boh tơring čar pơmin khŏm man pơkra jơlan rơdêh đuăi hmar anai. Tơdah lăi jơlan rơdêh đuăi hmar ƀơi dêh čar, kual Dap Kơdư aka ƀu hơmâo djơ̆ sa met jơlan pơpă ôh. Anai jing tơlơi rơngiă prong mơn hăng kual Dap Kơdư. Gơmơi pơmin, tơdah anih anom, biă ñu lĕ jơlan nao rai ƀu hơmâo lăng ba, biă ñu lĕ jơlan rơdêh đuăi hmar, tui anun kơplah wah Gia Lai lăi hơjăn, kual Dap Kơdư lăi hrŏm hăng hơdôm boh tơring čar kual ter hang ia rơsĭ Tong Krah, Ngŏ dơnung, Yŭ dơnung hăng hơdôm boh tơring čar gah Kơdư nao rai hơmâo anŏ tơnap mơn”.

Jơlan kơčun čoe An Khê, jơlan mrô 19, anih pơtruh nao rai tơring čar Gia Lai hăng Bình Định.

Hăng hơdôm kơčăo bruă pơkra jơlan rơdêh đuăi hmar glăk hơmâo ngă, kual Dap Kơdư glăk dong amăng tơlơi đĭ kyar phrâo. anom bơwih ƀong hăng mơnuih ƀon sang amăng kual glăk čang rơmang lu biă kơ tơlơi pơplih phrâo prong hluai tui hơdôm glông jơlan rơdêh đuăi hmar anai.

VOV Tây Nguyên: Čih - Siu H’Mai: Pơblang