VOV4.Jarai - Dak Lak glăk lĕ anih hơmâo klin Covid-19 lar hyu kơtang hloh ƀơi kual Dap kơdư hăng mrô mơnuih ƀă klin rơbêh 36.200 čô, amăng anun hơmâo 2.153 čô phrâo ƀă amăng lơ 28/2. Ƀơi plơi prong Buôn Ma Thuột, anih klin lar hyu kơtang hloh amăng tơring čar, Khua Jơnum min mơnuih ƀon sang tơring čar phrâo hơmâo hră pơ-ar ječ, rơkâo dong mơng lơ 1/3, djop sang hră brơi čơđai pơdơi nao sang hră mơng gưl I truh pơ gưl III, hơdai nao hrăm lăng nao rai mơng ataih.

Tui hăng hră pơtrun anai, mrô mơnuih ƀă klin Covid-19 ƀơi plơi prong glăk tŏ lu tui, mrô mơnuih F0 pơjrao pơ sang truh pơ 99% mrô mơnuih ƀă, yua anun bruă brơi čơđai pơdơi nao sang hră lĕ kiăng hloh pioh pơgang klin. Ƀơi Lâm Đồng ăt dŏ ƀuh klin lar hyu mơng 700 truh pơ giăm 800 čô amăng rĭm hrơi. Truh lơ 28/2, djop să, phường amăng plơi prong Đà Lạt hăng tơring glông Đơn Dương lĕ dua anih kual kơñĭ. Ƀơi anăp kơ klin ngă tơnap tap, dong mơng lơ 28/2 ƀing čơđai muai amăng plơi prong brơi pơdơi nao sang hră; čơđai mơng anih 1 truh pơ anih 6 hơdai nao hrăm lăng nao rai mơng ataih hăng jơlan hơdră pơtô hrăm phara.

Siu Đoan: Pơblang