VOV4.Jarai - Hrơi anai (1/6) jing Hrơi jar kmar pioh kơ ƀing čơđai. Hrŏm hăng dêh čar ta, ƀơi kual Dap Kơdư ăt hơmâo lu bruă ngă sit nik hăng ƀing čơđai. Blan 6 ăt jing “Blan ngă bruă yua kơ ƀing čơđai”, anom apăn bruă hăng hơdôm khul grup hơmâo lăng ba bruă ngui ngor kiăng ƀing čơđai hơmâo bơyan pơdơi prong mơ-ak mơ-ai, rơnuk rơnua.

Thun hrăm anai ƀiă abih laih, hơdôm Anom bruă, Sang gru grua boh thâo ƀơi tơring čar Kon Tum hơmâo pơphun ngă bruă ngui ngor amăng bơyan pơdơi prong 2022 laih anun pơphun čơkă ƀing čơđai mut hrăm taih, luai ia, kač rup, hrăm tơlơi Anglê...Rơngiao kơ anih hrăm kơ ƀing hơmâo tơlơi hor phara hơjăn ƀơi Anom bruă prong, Sang gru grua boh thâo yua anom apăn bruă wai lăng, ƀing čơđai ăt hơmâo mơn lu tơlơi dưi ruah pơkŏn hăng bruă mut amăng Grup prong, grup akŏ pơdong mă hơjăn pô. Amai Nguyễn Thị Tuyết Mai, Khua anom bruă pơtô bơbuă tơlơi rơgơi kơ Khul grup hlak ai hăng Tơlơi rơgơi pơtô ba bruă mă, tơlơi kiăng hrăm, Anom bruă Gru grua bơkơjăp drơi jăn hăng tuai čuă ngui Hlăk ai čơđai muai tơring čar Kon Tum brơi thâo, anom bruă hơmâo prăp lui laih tơdah hơmâo lu čơđai nao hrăm tơlơi hrăm gơñu hor amăng bơyan pơdơi prong thun anai.

“Rơngiao kơ nai pơtô mơng Anom bruă glăk hơmâo lĕ gơmơi amra iâu mơnuih djru ngă bruă, ƀing nai pơtô mơ̆ hơmâo hră pơ-ar, hrăm rơguăt bruă gah bơkơjăp drơi jăn či pok anih pơtô tui tơlơi čơđai hor, tơlơi rơgơi ngă bruă amăng Grup čơđai. Kơ anih anom, gơnam yua lĕ Khua mua anom bruă lăng ba lu mơn kah hăng gơnam pioh pơtô hrăm, brơi čơđai hrăm klă, tŭ yua”.

Phrâo rơgao, Gơnong bruă gru grua, bơkơjăp drơi jăn hăng tuai čuă ngui tơring čar Kon Tum pơphun pơplông “Čơđai pơƀuh hyu hơdrôm hră”, ngă pơhưč giăm 80 čô čơđai sang hră mơng hơdôm boh sang hră muai, gưl sa hăng gưl 2 nao lăng. Ƀing čơđai pơƀuh tơlơi rơgơi mơng ñu kah hăng pơtô pơblang, pơƀuh hră hăng rơbêh 40 tơlơi ră ruai hơmâo anŏ yôm. Hmư̆ hing lĕ tơlơi akhan, gru mơnuih hiam ngă bruă hiam, ră ruai kơ amĭ hăng Wa Hồ khăp ƀu-eng. Adơi Nguyễn Lê Thảo Ngọc, hrăm anih 5A, sang hră gưl sa mrô 1, tơring kual Plei Kần, tơring glông Ngọc Hồi, brơi thâo:

“Kâo phrâo ră ruai glăi tơlơi ră ruai Amĭ tơhan sông kơtang Nguyễn Thị Thứ. Kâo kiăng abih bang ƀing ta thâo, ƀing ta glăk hơdip amăng rơnuk rơngai. Tơlơi ră ruai kiăng ƀing ta hơdip hiư̆m pă djơ̆ lăp hăng tơlơi tơgŭ hơkrŭ, djai drơi pô mơng amĭ ama ơi yă ta đưm. Kâo rai pơplông hrŏm laih anun kâo lăng anai jing anih hrăm, ngui ngor klă biă. Ƀu kơnong tui anun đôč ôh mơ̆ ăt ba glăi lu tơlơi pôr kiăng kơđiăng lui, laih anun tơlơi hơdip hiam djru ba ƀing gơmơi hơmâo pran jua gir hrăm hră hloh”.

Anih pơtô rơguăt bruă gah ƀing čơđai tơring čar Kon Tum.

Bơ ƀơi Dak Lăk, Khul hlăk ai tơring čar hơmâo pơphun Jơlan hơdră pơpŭ bơni kơ ƀing čơđai ngă klă “5 tơlơi Wa Hồ pơtô”. Hrơi blan rơgao, hơdôm bruă ngă mơng čơđai ƀơi Dak Lăk djru hrŏm hăng đang bơnga hơdôm rơbâo bruă hiam đah mơng akŏ pơdong plơi pla hiam, pơdrong asah. Hmư̆ hing lĕ bruă pơplông ngă tui 5 tơlơi Wa Hồ pơtô; Gum pơgôp djru gơyut nao sang hră anăp nao tơlơi hơdip pơgi kơdih, hơdôm bruă ngă Trần Quốc Toản, Guang tơngan gơyut gơyâo...hăng hơdôm bruă hơdor tơngia, mơñum ia hơdor kơ pô klơi. Mơng hơdôm bruă anai hơmâo bu lu čơđai rơgơi mơbruă. Adơi Dương Thị Ngọc Anh, hrăm anih 9, sang hră gưl 2 čem rông ană bă djuai ƀiă tơring glông M’Drăk brơi thâo:

“Kâo mơ-ak biă mă. Kâo hơmâo thim lu gơyut gơyâo dong, gơñu gir tui kâo anai mơn, laih anun hơmâo lu mơnuih pơkŏn dong ngă tui 5 tơlơi Wa Hồ pơtô. Pơ anăp, kâo amra gum hrŏm djŏp bruă mơng sang hră, tơring glông pơphun tơdah hơmâo, laih anun amra pơtrut pran jua gơyut gơyâo gir tui hăng kâo mơn”.

Lăng yôm bruă jơnum ngui hrăm hră mơng ƀing čơđai amăng bơyan pơdơi prong, Khul hlăk ai tơring čar Dak Lăk hơmâo pơphun pơtô brơi tơlơi rơgơi, hơdră ngă bruă kơ ƀing khua khul, grup hlăk ai amăng plơi pla. Anun lĕ hơdôm tơlơi rơguăt bruă kah hăng: kiăng hao hač amăng hrơi jơnum sang hră, jơnum ƀut ƀăt; pơtô pơblang kơ bruă mơng khul, grup hluai tui hơdôm plang internet; khin pơhiăp ƀơi anăp lu mơnuih hăng hơdôm tơlơi khŏm kiăng thâo mơng khua hlăk ai. Amai Vũ Lê Thanh Ngân, grup hlăk ai 5, phường Tân An, plơi prong Buôn Ma Thuột, ră ruai:

“Pơ anăp anai brơi čơđai jơnum ngui bơyan pơdơi prong ƀơi plơi pla lĕ kâo amra mă yua lu tơlơi gơmơi hơmâo hrăm pioh jơnum brơi ƀing čơđai. Pơhmutu tơlơi thâo ngă bruă amăng grup, tơlơi thâo kiăng pơhưč lu čơđai gum pơhiăp, ngă hiư̆m pă kiăng pơhưč ƀing hlăk ai, kâo dưi hrăm mơng ƀing khua hlăk ai să, phường pơkŏn đah mơng thâo hloh, ngă hiư̆m pă đah mơng dưi pơphun bruă jơnum brơi čơđai ngui ngor klă hloh”.

Ayong Trần Doãn Tới, Kơ-iăng khua hlăk ai tơring čar, Khua Khul wai lăng grup čơđai tơring čar brơi thâo, djŏp gưl khul grup hlăk ai ngă hrŏm kơjăp hăng hơdôm anom bruă, hơdôm boh sang hră amăng bruă čơkă čơđai jơnum bơyan pơdơi prong, pơđĭ tui anŏ klă amăng bruă wai lăng, pơjing anih ngui ngor mơ-ak kơ ƀing čơđai, gir run anăm brơi hơmâo tơlơi truh sat kơ ƀing čơđai amăng bơyan pơdơi prong ôh.

“Blung a lĕ pơtô brơi ƀing khua wai lăng grup čơđai mơng să apăn bruă. Tal dua lĕ ngă hrŏm kơplah wah Khul wai lăng grup čơđai mơng să hăng hơdôm grup ƀơi plơi pla. Tal 3 anun lĕ pơđĭ tui tơlơi apăn bruă mơng hơdôm anom bruă kiăng thâo rơđah tơlơi hơdip ƀing čơđai, hăng amăng bruă ngă tui Tơlơi phiăn pioh kơ čơđai thun 2017”.

Dak lăk anăp nao ngui ngor bơyan pơdơi prong kơ ƀing čơđai pơ kual tơnap tap.

Hrŏm hăng anun, Khul hlăk ai tơring čar Dak lăk glăk iâu pơthưr abih bang mơnuih akŏ pơjing anih ngui ngor mơ-ak kơ ƀing čơđai, pok anih ngui ngor brơi ƀing čơđai amăng bơyan pơdơi prong. Pơphun pok anih pơtô hơdor glăi tơlơi hrăm amăng bơyan pơdơi prong pioh kơ čơđai pơ kual ataih, tơnap tap kiăng ƀing čơđai hrăm thâo ƀiă tơdơi kơ lu blan hrăm mơng ataih.

VOV Tây Nguyên: Čih - Siu H’Mai: Pơblang