Ƀu kơnong ƀơi sang hră đôč ôh, hơdôm anih hrăm amăng anih čơđai dŏ mơ̆ng Sang hră čem rông ană bă djuai ania ƀiă gưl 3 - gưl 2 tơring glông Kon Plŏng, bruă hrăm tơlơi pơplông hơmâo abih bang hrăm klă, ječ ameč. Rơngiao kơ mông hrăm hơmâo nai pơtô brơi, 82 čô čơđai mơ̆ng sang hră hơmâo pơplông abih anih 12 thu anai ăt thâo hluh hrăm mă pô mơn. Adơi Trần Trung Thành, čơđai hrăm anih 12B, brơi thâo:

“Ƀing gơmơi pơpha hrơi hrăm, mơguah hrăm hơdor glăi hăng hrăm ƀơi sang hră. Yang hrơi tlam hrăm hơdor glăi rah, ƀrô ngui ngor hai kiăng plai ƀiă gleh. Ƀing gơmơi gir abih pran jua hrăm hơdor lui hơdôm tơlơi nai pơtô brơi ăt kah hăng gơmơi hơmâo ngă lăng hlâo lu tơlơi pơplông mơ̆ng hơdôm thun hlâo kiăng thâo kơjăp amăng tal pơplông pơ anăp anai”.

Hăng 69 čô čơđai djuai ania ƀiă pơplông abih anih 12 thun anai, nai pơtô Bùi Văn Quế, Kơ-iăng khua sang hră čem rông ană bă djuai ania ƀiă gưl 3 - gưl 2 tơring glông Kon Plŏng brơi thâo, khua mua amăng sang hră hăng nai pơtô lăng ba lu biă hăng ƀing čơđai kah hăng pơđar nao ƀing nai wai lăng pơtô brơi ƀing čơđai hrăm yang hrơi mơmot; hăng ƀing čơđai hrăm ƀu thâo đơi lĕ nai pơtô ba dong lơ̆m hrăm pơ sang hră, pơtô brơi hơjăn kiăng ƀing čơđai hơmâo pran jua pơplông klă hloh:

“Khua mua sang hră juăt tơña bla na nao kơ ƀing čơđai, juh alum gơñu lơ̆m dŏ hrăm pơ sang hră. Rơngiao kơ anun amăng mông huă asơi rim hrơi gơmơi nao pơ sang tơnă asơi tơña bla ƀing čơđai ƀong huă hiư̆m pă. Ƀing khua sang hră čih hră rơkâo Jơnum min mơnuih ƀôn sang tơring glông Kon Plŏng djru brơi 69 čô čơđai sang hră djuai ƀiă kơ prăk ƀong huă amăng 4 hrơi pơplông kiăng hơmâo gơnam ƀong lu hloh pơtrut pơsur ƀing čơđai kiăng hơmâo pran”.

Tal pơplông abih anih 12 thun anai tơring čar Kon Tum hơmâo 5.028 čô čơđai, amăng anun hơmâo 1.722 čô čơđai djuai ƀiă. Yă Phạm Thị Trung, Khua gơnong bruă pơtô hăng pơjuăt tơring čar Kon Tum brơi thâo, klin Covid-19 sui amăng lu thun jing bơbeč prong biă kơ bruă hrăm hră mơng ƀing čơđai lăi hrŏm hăng mơ̆ng čơđai djuai ania ƀiă lăi hơjăn. Kiăng djru ƀing čơđai thâo kơjăp tơlơi hrăm, pơplông thâo, Gơnong bruă pơtô hăng pơjuăt tơring čar Kon Tum ngă tui jơlan hơdră pơtô phara hăng rim čô čơđai:

“Giăm truh hrơi pơplông, gơnong bruă ăt hơmâo akŏ pơdong grup nao djru pơ rim boh sang hră, jao akŏ bruă hăng pơhmư̆ mông pơtô čơđai tui jơlan hơdră pơtô phara. Rim čô čơđai jing sa akŏ bruă phara. Hrăm glăi tơlơi hrăm hluai tui tơlơi pơmin anun kiăng ƀing čơđai thâo anŏ gơñu aka ƀu thâo hluh, anŏ rơgơi mơ̆ng ƀing gơñu. Tơdơi kơ pơplông lăng, gơmơi kah phara dong mơn ha wơ̆t dong kiăng thâo krăn tơlơi thâo mơ̆ng ƀing čơđai. Ƀing čơđai mơ̆ kiăng djru phara lĕ sang hră hơmâo čih pơkra glăi dong hơdôm tơlơi kiăng pơtô hrăm kiăng ƀing čơđai hơmâo pran jua nao pơplông pơkra ƀai”.

Tal pơplông thun anai, tơring čar Dak Lăk hơmâo rơbêh 21.000 čô čơđai pơplông, amăng anun hơmâo mơnuih ƀon sang djuai ƀiă hơmâo 28%. Kơ mrô anih pơplông, hơmâo 33 anih pơplông sit nik hăng abih bang 900 boh anih. Truh ră anai, hơdôm anom bruă hơmâo pơhlôm djŏp anih anom gơnam yua, măi mok ƀơi hơdôm anih pơplông, anih in tơlơi pơlông hăng anih čŏm puang.

Gơnong bruă ăt pơkiăo nao giăm 3000 čô khua, nai wai lăng, nai čŏm puang, aka ƀu yap ba ôh mơnuih krăp lăng anih pơplông. Bruă pơtŏp brơi ƀing nai lăng pơplông, prăp lui gơnam tam, pơgang duam ruă brơi kơ ƀing čơđai hơmâo pơhlôm. Anom bruă git gai tơlơi pơplông, brơi thâo glăk ngă klă bruă pôr pơthâo, juh alum kiăng čơđai hơđong pran jua nao pơplông. Laih dong pơsit hơmâo prăp lui tong ten laih, pơhlôm rơnuk rơnua hloh amăng hrơi pơphun pơplông. Đại tá Nguyễn Hữu Lương, Khua anom bruă rơnuk rơnua kơđi čar, kông an tơring čar Dak Lăk brơi thâo:

“Abih bang bruă bơdjơ̆ nao hơdôm tơlơi truh ƀơi Čư̆ Kuin mah bơbeč djơ̆ mơn bruă pơhlôm rơnuk rơnua, samơ̆ gơmơi lăng huăi bơngơ̆t đơi lơi či pơphun brơi čơđai pơplông ƀơi Dak Lăk ră anai. Tơhan kông an Dak Lăk ngă hrŏm kơjăp hăng anom bruă pơtô hrăm tŭ ư hrŏm amăng bruă mă kơplah wah tơring čar hăng tơring glông amra pơhlôm rơnuk rơnua kơ tal pơplông anai”