VOV4.Jarai - Pơdai lĕ phun pla ba glăi pơhrui phun kơ mơnuih ƀon sang ƀơi tơring glông Ea Súp, tơring čar Dak Lak. Samơ̆, anai lĕ phun pla pơhrui phun mơng mơnuih ƀon sang Ea Súp glăk bơbeč nao kơtang yua eh akan ƀong  glăk lar hyu kơtang hăng pơčrăm ngă sat pơdai. Mơnuih ngă hmua, djop gưl gong gai hăng anom bruă bơdjơ̆ nao amăng tơring glông glăk ječ ameč pok pơhai hơdôm hơdră pơgang eh akan ƀong pơdai.

Rơbêh 1 wŏt hrơi tơjuh anai, Khul mơnuih ngă hmua să Ea Lê, să hơmâo hmua pơdai prong hloh amăng tơring glông Ea Súp, tơring čar Dak Lak glăk hơmâo lu bruă yua eh akan ƀong glăk lar hyu kơtang amăng să. Tui hăng yă Trần Lệ Thuỷ, Kơ-iăng Khua khul brơi thâo, anai lĕ bơyan ƀuh eh akan ƀong lu hloh amăng 6 thun rơgao. Khul hơmâo gum hrŏm hăng anom bruă pơsur ngă hmua, anom bruă wai pơgang phun pla tơring glông, pel ĕp kiăng hmao tlôn hăng črâo ba mơnuih ngă hmua hơdôm hơdră pơgang brơi lăi djơ̆. Yă Trần Lệ Thủy, yua eh akan ƀong lar hyu kơtang, sa, dua boh sang anŏ khŏm yuă pơdai lơ̆m dŏ mơtah. Sa, dua boh sang anŏ pơkŏn khŏm lui hĭ.

“Tơdah eh akah ƀong amăng hmua pơdai dŏ mơtah amra lui ruh mơtăm. Bơ hơdôm sang anŏ tơdah pơdai ƀiă pơsă laih, mơ̆ aka ƀu truh hrơi yuă hơuă amra khŏm yuă hĭ mơn. Tơdah pioh lui sui eh akan amra ƀong răm abih mơtăm yơh. Yua anun să amra pơhrui ƀu hơmâo, mơ̆ bơyan không phang anai lĕ bơyan pơhrui glăi lu hloh amăng ha thun”.

Să Ea Lê bơyan anai, pơdai glăk pơsă lăng kơñĭ dua gah hmua pơdai rok tui jơlan glông amăng să. Ding dong amăng jơlan ƀing ta amra ƀuh amăng hmua pơdai peñ hla yua kơ eh akan ƀong. Tơdơi kơ tal nao čuă hmua pơdai glăi, ơi Nguyễn Đức Thịnh dŏ ƀơi ƀut plơi 3, să Ea Lê hning rơngŏt yua kơ pơdai eh akan ƀong peñ abih hla.

“Eh akah ƀong peñ abih hla pơdai. Ih ƀuh bơ kơlĕ, mut nao amăng hmua pơdai kah mơng ƀuh tong ten, kar hăng pơ anăp anun pơdai djai abih yơh”.

Bơyan puih phang thun 2021-2022 ƀơi Ea Súp pơphun hăng bruă yuă pơdai tañ ƀiă hŭi eh akan ƀong

Amăng mrô mơnuih ngă hmua khŏm yuă pơdai tañ ƀiă yua kơ eh akan ƀong, ayong Hồ Giáp dŏ ƀơi ƀut plơi 3, hơmâo yuă giong 4 ar hmua pơdai amăng rơbêh 2 ektar kơ sang anŏ. Ayong Giáp brơi thâo, ăt amăng 4 ar anai, amăng bơyan hlâo anun sang anŏ dưi pơhrui glăi 3 tơ̆n pơdai, samơ̆ bơyan anai pơhrui kơdong 2 tơ̆n ha mơkrah đôč. Bơyan hlâo anun, sang anŏ pơhrui wŏt adrăng pioh kơ čem kơbao rơmô, samơ̆ bơyan anai adrăng khom čuh hĭ abih.

“Hrơi anai yuă, tơdah mlăm kơñ huăi hơjan hrơi pơgi amra čuh hĭ adrăng. Tơdah čuh hĭ kah mơng pơdjai hĭ boh eh akan. Tơdah ƀu čuh hĭ, truh bơyan tơdơi amra čeh čar tañ biă mă”.

Tui hăng anom bruă wai pơgang phun pla tơring glông Ea Súp, amăng giăm 6 thun, eh akan ƀong amra ƀuh sa wŏt amăng hơdôm kual ngă hmua pơdai ia amăng tơring glông, samơ̆ bơyan anai ƀuh eh akan ƀong kơtang ƀiă hơdôm tal hlâo anun. Biă mă ñu lĕ ƀơi kual ngă hmua pơdai mrô 1, să Ea Lê, anih hơmâo jŭ yap hơmâo lu hmua pơdai peñ abih hla amăng đơ đam rơbêh 20 rơbâo met karê. Tui hăng ơi Nguyễn Văn Thuỷ, Khua anom bruă, kiăng pơgang hŭi eh akan ƀong lar hyu, bơbeč nao bơyan tơdơi, anom bruă hơmâo kơtưn pơtô pơblang, črâo brơi boh thâo pla pơjing lăp djơ̆. Laih dong kơtưn krăo lăng anih anom sĭ ia jrao pơgang phun pla, anăm brơi sĭ nua, ngă glêh tơnap kơ mơnuih ngă hmua:

“Sa, dua plah hmua eh akan ƀong, samơ̆ kơnong hơdôm hrơi dong lĕ yuă hơpuă, ƀing gơmơi pơsur neh met wa tañ yuă pơdai. Hăng hmua aka ƀu pơsă amra pruih ia jrao. Dua lĕ dong ƀing gơmơi ăt nao tơl hơdôm sang sĭ ia jrao pơgang phun pla, pơtă pơtăn djop sang sĭ phrâo anăm đĭ nua amăng bơyan hlăt mŏt pơčrăm anai. Tơdah ƀing gơmơi ƀuh pơpă ngă soh amra rơkâo gong gai nao pơsir hĭ mơtăm".

Ea Súp lĕ tơring glông ngă hmua pơdai prong hloh amăng tơring čar Dak Lak, hăng 8 rơbâo ektar amăng bơyan puih phang anai. Yua dơnao pơkŏng ia man pơkra kjăp, lu mơnuih ngă hmua amăng tơring glông dưi ngă pơdai 3 bơyan rĭm thun, kơplah wah rĭm bơyan hơdôm hrơi đôč. Lơ̆m anun, ayuh hyiăng thun anai ƀơi Ea Súp pơplih phara, hăng ayuh hyiăng rơ-ŏt, huăi pơ-iă, hơjan lu pơhmu hăng rĭm thun. Anai lĕ hơdôm tơlơi gal ngă kơ eh akan ƀong tŏ kơtang tui, ngă sat amăng bơyan pơ anăp dong amăng tơring glông. Mơnuih ngă hmua, gong gai djop gưl hăng hơdôm anom bruă bơdjơ̆ nao amăng tơring glông glăk tŏ tui hơdôm hơdră bruă lăp djơ̆ kiăng tañ pơgang klin, pơhlôm bruă ngă hmua pơdai - anai lĕ bruă mă ba glăi pơhrui phun mơng mơnuih ƀon sang ƀơi ƀon lan.

Siu Đoan: Pơblang