Tơdơi kơ tal ia lip kơtang hloh ter hang ia krông Dă Nhim, ayong Nguyễn Quốc Bảo, dŏ ƀơi să Đơn Dương, Lâm Đồng ăt aka ƀu abih bral rơngal. Sang mơnil prong 4.000 met karê nua ñu rơbêh 1,6 klai prăk mơng sang anŏ ñu ia kor đuăi. Ñu lăi:  

“Ƀing gơmơi hơmâo hơdôm hơbơ̆i lêng kơ tuh pơ alin abih ƀơi anai, ră anai ƀing gơmơi ƀu hơmâo prăk rŭ pơdong glăi dong tah. Tơdah ƀing gơmơi kiăng ngă glăi khŏm tuh lŏn phrâo, tơlơi anai ngă rơngiă lu prăk kak”.

Hơdôm boh sang anŏ pla añăm tam tui jơlan gah pla pơjing tui hơđăp ter hang ia krông Dă Nhim ăt glăk rŭ pơdong glăi tơdơi kơ ia dăo. Yua čong kuai abih ha mơguah kah hăng ĕp ƀuh hơdôm hơpluh met đing ia, ayong Hồ Việt Linh, dŏ amăng plơi Tân Lập 1, să Ka Đô brơi thâo, rơbêh 6.000 met karê añăm xa lach kơ sang anŏ glăk prap pĕ pơhrui mơ̆ ia kor hĭ. Lŏn hmua čuah pơtâo dor hĭ đa truh ha met. Hơkrŭ glăi bruă ngă hmua amra ngă glêh glar rah hăng ngă rơngiă lu prăk tuh pơ alin:

“Đa rơngiă hĭ abih, đa lŏn dor hĭ. Ră anai kiăng rŭ pơdong glăi ƀơƀrư̆ kah dưi. Gơnam hơget dŏ glăi ƀing gơmơi mă yua glăi, bơ gơnam rơngiă, răm rai khŏm pơplih hĭ yơh. Ră anai kiăng plih hĭ ƀek pruih ia, plih hĭ đing, ko djop mơta. Lŏn aka ƀu dưi čoh pơkra glăi, ăt dŏ tơngiă lŏn krô kah mơng dưi ngă”.

Răm abih lĕ dua tơlơi lăp djơ̆ hloh brơi hơdôm kual pla añăm tam, hơbơi pơtơi, boh troh phun ter hang ia krông Dă Nhim ƀơi hơdôm boh să: D’ran, Ka Đô, Đơn Dương, Quảng Lập amăng tơring čar Lâm Đồng. Hrŏm hăng đang hmua pla añăm tam glăk pơhrui, anŏ răm rai kơtang ƀiă hăng mơnuih pla añăm tam yua boh thâo phrâo ƀơi hơdôm kual anai yua răm sang mơnil, sang ñuôl hăng prăk tuh pơ alin brơi 1.000 met karê đĭ hơdôm rơtuh klăk prăk.

Ƀơi anăp kơ anŏ răm rai mơng mơnuih pla añăm tam, gơnong bruă ngă hmua hăng gong gai hơdôm boh să kual akŏ phun pla añăm tam amăng tơring čar Lâm Đồng hơmâo pok pơhai bruă pơsur ngă hmua, čan prăk ngă hmua kiăng djru mơnuih ƀôn sang rŭ pơdong glăi bruă ngă hmua. Ơi Trần Hùng Dũng, Khua Jơnum min mơnuih ƀôn sang să Đơn Dương, tơring čar Lâm Đồng brơi thâo:

“Blung hlâo să tŏ tui pơtrut pơsur neh met wa gơgrong pơkra glăi lŏn ngă hmua glăk bơdjơ̆ nao yua ia dăo rơgao hăng amra jŭ yap glăi djop phun pla lăp djơ̆. Sit biă ñu lĕ kiăng sĭ amăng bơyan ƀong tết tui phiăn juăt ruah hơdôm djuai phun pla, hơdôm djuai añăm tam ƀiă hrơi kiăng hmao sĭ amăng bơyan ƀong tết pơ anăp. Sui pơ anăp amra tŏ tui pơplih pơkra hăng hơmâo jơlan gah pơđĭ kyar sui pơ anăp dong kiăng hơmâo akŏ bruă tong ten hăng amra jak iâu djru mơng pơkŏn dong kiăng bruă hơkrŭ glăi bruă pla añăm tam ƀơi să Đơn Dương”./.