VOV4.Jarai - Čơtlăm lơ 5/8, ƀơi plơi prong Buôn Ma Thuột, pơphun Jơnum lăi pơhư̆č, pơtrut tua čuă ngui truh pơ̆ 5 bôh tơring čar “Quảng Bình – Quảng Trị - Thừa Thiên Huế - Đà Nẵng – Quảng Nam” ƀơi hơdôm bôh tơring čar kual Dăp Kơdư. Bruă jơnum kiăng lăi pơhư̆č gru rŭp Kual djă pioh gru klă hiam, lăi pơthâo hơdôm anih anom tuai čuă ngui hăng jơlan hơdră pơsur mơng 5 bôh tơring čar kual Tŏng Krah dêh čar lĕ Quảng Bình, Quảng Trị, Thừa Thiên Huế, Đà Nẵng hăng Quảng Nam truh hơdôm bôh sang bruă wai lăng tuai čuă ngui ƀơi kual Dăp Kơdư.

Hrom hăng anun pơtrut tơlơi pơlir hơbit, gum hrom pơđĭ kyar bruă tuai čuă ngui kơplah wah 5 bôh tơring čar anai hăng hơdôm bôh tơring čar kual Dăp Kơdư, ngă gal brơi kơ hơdôm bôh anom bơwih ƀong gum hrom pơđĭ kyar anih anom tuai čuă ngui, kơtưn tô nao rai kơplah wah 2 kual, djru hơkrŭ glăi, đĭ kyar hăng ngă brơi bruă tuai hyu čuă ngui jing bruă bơwih ƀong ba jơlan hlâo. Kiăo tui anun, hơdôm bôh anom hmâo kĭ pơkôl hră gum hrom, pơđĭ kyar bruă tuai čuă ngui kơplah wah hơdôm bôh tơring čar amăng 2 kual Tŏng Krah dêh čar hăng kual Dăp Kơdư./.

Siu H’ Prăk: Pơblang