VOV4.Jarai - Čơtlăm lơ 12/9, Ping gah tơring čar Gialai pơphun Jơnum pok pơhai tơlơi pơsit mơng Grŭp git gai Ping gah kơ bruă mơnuih apăn bruă, lăi pơthâo tơlơi pơsit mơng Grŭp git gai Ping gah kơ bruă ba, ruah ơi Trương Hải Long – ding kơna hơđăp Grŭp mă bruă Ping gah, Kơ-iăng Khua Ding jum pơphun bruă gum hrom Grŭp mă bruă, Grŭp apăn bruă Ping gah tơring čar Gialai, ngă Kơ-iăng Khua git gai Ping gah tơring čar Gialai rơwang bruă 2021-2026.

Ơi Hoàng Đăng Quang – Kơ-iăng Khua grŭp pơphun bruă Kơnuk kơna lăi pơthâo tơlơi pơsit mơng Grŭp git gai Ping gah kơ ơi Trương Hải Long

Amăng mông jơnum, dưi hmâo tơlơi jao bruă mơng grŭp git gai bruă Ping gah hăng Grŭp pơphun bruă Ping gah dêh čar, ơi Hoàng Đăng Quang – Ding kơna Ping gah dêh čar, Kơ-iăng Khua Grŭp pơphun bruă Ping gah lăi pơthâo tơlơi pơsit. Ơi Trương Hải Long, tơkeng lơ 18/4/1976, plơi pla tơring glông Yên Phong, tơring čar Bắc Ninh, mut Ping gah thun 2004, hrăm giong Đại học Khoa xã hội hăng Nhân văn, Đại học Ngoại ngữ (Đại học Quốc Gia Hà Nội); hrăm giong thạc sĩ tơlơi phiăn hăng pơblang bruă kơđi čar gưl dlông. Hlâo kơ dưi ruah ngă Kơ-iăng Khua git gai Ping gah tơring čar Gialai, ơi Long hmâo ngă laih Kơ-iăng Khua, Khua Anom pơphun bruă mă – mơnuih mă bruă, Ding jum pơphun bruă kơnuk kơna; Ding kơna Grŭp mă bruă Ping gah, Kơ-iăng Khua Ding jum pơphun bruă kơnuk kơna (mơng blan 6/2021) hăng hmâo pơkă ngă khua Ding jum pơphun bruă Kơnuk kơna rơwang mơng thun 2021-2026./.

Siu H’ Prăk: Pơblang