Tơdơi kơ 1 blan pơphun mă bruă gong gai kơnuk kơna 2 gưl, tơring čar Lâm Đồng dong tal 4 amăng dêh čar, tui rơnoh pơkă ngă djơ̆ pran jua ană plơi bơwih brơi ngă hră pơar mơ̆ng dêh čar. Mah hnun lơ̆m pơphun bruă mă amăng kơnuk kơna dua gưl ăt ƀu ƀiă ôh bưp tơlơi tơnap tap, gun gan ƀơi să. Ƀuh rơđah tơlơi pơhing lăi kơƀah mơnuih mă bruă thâo hruaih, ta juăt lăi mơnuih kơhnăk amăng bruă mă pơsir brơi kơ mơnuih ƀôn sang. Đơ đam tơring čar hơmâo 93 boh să, phường ƀu hơmâo mơnuih apăn bruă kơhnăk sa hơnơ̆ng amăng boh thâo phrâo tơlơi pơhing; 60 boh să, phường kơƀah mơnuih apăn bruă gah kông ngăn lŏn mơnai hăng ayuh hyiăng; 33 boh să, phường kơƀah mơnuih mă bruă thâo gah bruă man pơdong....

Mơ̆ng lơ 1/8, Jơnum min mơnuih ƀôn sang tơring čar Lâm Đồng hơmâo pơhrua mrô mơnuih apăn bruă, ngă khua glăi pơ să djru bruă mă gong gai kơnuk kơna plơi pla.

Amăng tal anai hơmâo 260 čô mơnuih apăn bruă brơi djru ba gưl să. Hrŏm hăng anun, Kông an tơring čar Lâm Đồng mơ-it nao 370 čô khua mua, ling tơhan kông an hăng gah anom bruă tơhan blah ngă lĕ mơ-it nao 100 čô mơnuih glăi mă bruă pơ să. Him lăng ƀing khua mua, mơnuih mă bruă anai amra djru bruă mă ƀơi să amăng 3 blan, pơčrâo brơi bruă mă hăng ngă hrŏm pơsir bruă mă tui tơlơi pơpha bruă mơ̆ng tơring čar jao; pơtô ba, pơhrăm kơ ƀing khua mua ƀơi să.