VOV4.Jarai - Mơng akŏ thun truh ră anai, tơring čar Lâm Đồng ƀuh rơbêh 50 wŏt arăng phă glai, amăng anun hơmâo 14 wŏt aka ƀu ĕp ƀuh hlơi pô ngă soh. Anom bruă bơdjơ̆ nao hơmâo ngă hră pơ-ar pơsir hĭ 47 wŏt, amăng anun hơmâo 3 wŏt pơsir kơđi hình sự, pơhrui glăi rơbêh 84 m3 kyâo djop mơta hăng phak duh ngăn drăp kơnuk kơna rơbêh 789 klăk prăk. Amăng mrô anai, tơlơi ngă glêh tơnap hloh lĕ 5 wŏt ƀuh phă glai prong amăng tơring glông Lạc Dương, Đam Rông hăng Bảo Lâm.

Ră anai anom bruă kông ang glăk tŏ tui pel ĕp, ngă hră pơ-ar kiăng kơ pơsir hĭ hơdôm tơlơi ngă soh. Tui hăng gơnong bruă ngă hmua hăng pơđĭ kyar ƀon lan tơring čar Lâm Đồng, ƀu djơ̆ kơnong phăn glai đôč ôh mơ̆ bruă sua mă lŏn glai ăt ƀuh lu mơn. Ba truh tơlơi anai lĕ yua arăng đĭ nua lŏn, lu mơnuih ƀu ah gơnah nao tơlơi phiăn, hơmâo lu tơlơi ngă soh kiăng kơ sua mă lŏn glai kiăng kơ sĭ mơdrô. Hăng hơdôm kual lŏn ia, anom bruă bơdjơ̆ nao khŏm mă glăi hăng pla glăi glai kyâo, laih anun pơsir hĭ hơdôm tơlơi ngă soh.

Siu Đoan: Pơblang