VOV4.Jarai - Jơlan rơdêh đuăi hmar Dầu Giây - Liên Khương glông năng ai 200km, hơmâo kah jing 3 črăn anun lĕ: Dầu Giây - Tân Phú, Tân Phú - Bảo Lộc hăng Bảo Lộc - Liên Khương. Amăng anun, 2 kơčăo bruă: Tân Phú - Bảo Lộc hăng Bảo Lộc - Liên Khương, glông giăm 140 km yua Jơnum min mơnuih ƀon sang tơring čar Lâm Đồng - anom bruă Kơnuk kơna dưi pơphun ngă. Tui hăng Jơnum min mơnuih ƀon sang tơring čar Lâm Đồng, tơring čar amra brơi 4.500 klai prăk amăng mrô 16.200 klai prăk kơ 66 km jơlan rơdêh đuăi hmar Tân Phú - Bảo Lộc; brơi nao 10.800 klai prăk amăng mrô 12.000 klai prăk, kơ 73km jơlan rơdêh đuăi hmar Bảo Lộc - Liên Khương. Anai jing mrô prăk mơng tơring čar prong hloh mơng hlâo truh kơ ră anai pioh pơkra jơlan.

Mơnuih ƀon sang tơring čar Lâm Đồng nao lăng hră lơkak pơkra jơlan rơdêh đuăi hmar

Ơi Trần Văn Hiệp, Khua Jơnum min mơnuih ƀon sang Lâm Đồng brơi thâo, jơlan rơdêh đuăi hmar Dầu Giây - Liên Khương jing tơlơi čang rơmang prong biă mă mơng ƀing khua hăng mơnuih ƀon sang tơring čar Lâm Đồng. Yua hnun, tơring gir prăp lui, ngă gêh gal brơi đah mơng pơphun pơkra jơlan hlao mơtăm lơ̆m hơmâo Khua dêh čar pơsit brơi.

Siu H’Mai: Pơblang